Polísia Munisípiu Dili, Seksaun Tránzitu halo apreensaun ba motorizada 204 no karreta privadu 24. Imajen Tatoli/Eugénio Pereira

DILI, 22 marsu 2021 (TATOLI)-Motorizada 204 ho karreta 24, tenke ba para provizóriu iha arredores Polísia   Nasionál Timor-Leste (PNTL) Munisípiu Dili, tanba la kumpre regra serka sanitaria no komete infrasaun Lei Tránzitu nian.

Notísia Relevante : PNTL halo apreensaun ba motorizada 200

Komandante Polísia Unidade Tránzitu Dili, Inspetór Domingos Sarmento Gama, informa motorizada ho karreta privadu hirak ne’e, Polísia halo apreensaun durante hala’o operasaun iha Dili laran, hosi loron 13 to’o 19 marsu, hodi asegura    aplikasaun regra serka sanitaria no konfinamentu domisiliáriu iha kapitál Dili.

“Ami halo atuasaun no apreensaun  bazeia ba rezolusaun Governu hodi aplika serka sanitária,” Inspetór Domingos Sarmento Gama, informa  ba jornalista iha Komandu PNTL Munisípiu Dili, segunda ne’e.

Tuir informasaun hosi Polísia katak infratór balun hahú selu ona multa iha banku hodi hatama osan ba kofre Estadu ho montante $3,125.00 no sira ne’ebé kumpre ona sira-nia devér selu multa (koima) foti fali ona sira nia motór no karreta.

Operasaun ne’e nu’udar mós meiu ida hodi bolu atensaun ba abitante sira atu kontribui ho Estadu luta kontra propagasaun COVID-19 ne’ebé nakda’et ona iha komunidade nia leet (transmisaun komunitária).

Transmisaun komunidade klasifika ba nivel haat (4); . kazu sira ne’ebé hetan lokalmente, namkari iha loron 14 liubá, ho kazu barak mak la ligadu ba agrupamentu espesífiku;  Transmisaun ne’e  dalaruma konsentra iha sub-grupu populasaun balun de’it.

Inspetór Domingos Sarmento Gama, hateten maioria infratór sira ne’ebé sira-nia transporte hetan apreensaun viola regra serka sanitaria no la uza máskara, motór dokumentu laiha, inklui viola lei tránzitu tanba sa’e motór la uza kapasete no seluk tan.

Durante halo operasaun, polísia mós fó toleránsia ba infratór sira ne’ebé maka sira nia dokumentu hanesan karta kondusaun no STNK inválidu  iha tempu Estadu Emerjénsia hahú hosi fevereiru to’o marsu 2021.

“Ita tolera ba sira ne’ebé dokumentu inválidu hosi fevereiru to’o marsu ne’e. Maibé sira ne’ebé dokumentu inválidu  antes Estadu Emerjénsia ne’e ita la tolera,” Domingos Gama afirma.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here