Membru PNTL hala'o hela operasaun iha área Hudi-Laran, Dili, Kinta 18 marsu 2021. Imajen Tatoli/Antonio Goncalves

DILI, 22 marsu 2021 (TATOLI)- Polísia Nasionál Timor-Leste (PNTL) liuhosi Servisu Investigasaun Kriminál Dili halo ona investigasaun hodi buka hatene motivu loloos hosi kazu konfrontu ne’ebé akontese iha área Golgota, Raikotu, Dili, domingu (21/03).

Adjuntu Komandante  PNTL Munisípiu Dili, Superintendente Euclides Belo, informa bainhira konfrontu ne’e akontese, PNTL to’o kedas lokal akontesimentu no rekolla informasaun hosi vítima na’in-rua  ne’ebé hetan sona no baku hosi suspeitu balun.

Notísia Relevante : PNTL detein joven na’in-rua, ida tattoo anti Polísia no F-FDTL

“Konfrontu ne’ebé akontese iha área Golgota nian ne’ebé mosu tentativa krime ida envolve suspeitu na’in-rua halo asaun hasoru vítima na’in-rua no rezulta vítima na’in-rua kanek,” Superintendente Euclides Belo, ba jornalista iha Komandu PNTL Dili, segunda ne’e.

Vítima na’in-rua ne’ebé kanek hala’o hela tratamentu intensivu iha Sentru Saúde  Comoro no parte PNTL buka tuir ona suspeitu na’in-rua ne’ebé sona kanek no baku vítima.

Atu evita konflitu, parte PNTL koordena autoridade suku no Ofisiál Polísia Suku (OPS) ho Konsellu Polisiamentu Komunitária (KPK) hodi asegura seguransa iha vítima sira-nia rezidénsia.

 Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here