Imajen/Media PN.

DILI, 22 marsu 2021 (TATOLI)—Parlamentu Nasionál (PN), ohin, aprova projetu-rezolusaun ida hodi regula reuniaun plenária no reuniaun komisaun nian durante períodu konfinamentu domisiliáriu iha Munisípiu Dili ne’ebe dekreta iha ámbitu Estadu Emerjénsia.

Projetu-rezolusaun númeru 68/4(3a) kona-ba realizasaun reuniaun plenária no komisaun espesializada permanente sira aprovada ho rezultadu votasaun a-favór 46, kontra 0 no abstensaun 13.

“Projetu-rezolusaun ne’e kona-ba realizasaun plenária semana ida dala-ida iha loron segunda-feira, maibé la taka dalan ba plenária estraordinária,” Prezidente Parlamentu Nasioál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál.

Bazea ba Konstituisaun RDTL artigu 92, Prezidente Parlamentu Nasionál konsulta ona liuhosi konferénsia reprezentante bankada parlamentár hodi hasai pontu importante rua durante konfinamentu domisiliáriu iha Munisípiu Dili.

Pontu daduluk, durante períodu vijénsia konfinamentu domisiliáriu jerál ba populasaun Munisípiu Dili, adota ho ezekusaun Estadu Emerjénsia to’o 02 abríl 2021, Parlamentu Nasionál sei realiza reuniaun plenária dala-ida kada semana (segunda-feira) maibé la prejuizu ba realizasaun plenária estraordinária.

Daruak, durante períodu vijénsia konfinamentu domisiliáriu jerál ba populasaun iha munisípiu Dili adota ho ezekusaun Estadu Emerjénsia to’o 02 abríl 2021, komisaun espesializada permanente sira realiza reuniaun prezensiál estritamente nesesária ba andamentu prosesu lejizlativa prioritária sira, maibé respeita ba medida distansiamentu sosiál, bele organiza liuhosi vodeo konferénsia.

Jornalista: Evaristo Soares Martins

Editór: Cancio Ximenes


HAKEREK NO HATÁN

Please enter your comment!
Please enter your name here