Traballadór sira hatún foos hodi tula ba kamioneta sira iha merkadu pontu entrada Tasi-Tolu, Dili atu transporta ba Liquiça, Ermera no Bobonaro, sesta (19/3/2021). Imajen Tatoli/Antonio Gonçalves

LIQUIÇA, 22 marsu 2021 (TATOLI) – Ministériu Turizmu, Komérsiu no Indústria (MTKI) Munisípiu Liquiça, segunda ne’e, halo observasaun direta ba iha merkadu Maubara hodi fó atensaun no halo alerta atu negosiante sira labele inventa folin foos.

MTKI Liquiça nia intervensaun ne’e bazeia ba realidade balun iha Merkadu Liquiça ne’ebé hatudu katak negosiante sira hasa’e folin foos hosi $13,00 ba $16,00 kada 25 kilograma no foos ho kilograma 30 nia folin sa’e hosi $14,00 to’o $19,50 sentavu.

Notísia Relevante : Folin foos iha Liquiça sa’e ba $16 to’o $19

“Ami mai iha Merkadu Maubara nian atu halo normalizasaun ba folin sasán sira liu-liu foos,” Diretór MTKI Munisipiu Liquiça, Salvador Serão dos Santos, informa ba Agência Tatoli iha Maubara.

Atividade intervensaun ne’e sei hala’o mós iha Merkadu Munisípiu Liquiça no merkadu sira iha suku hotu ne’ebé pertense ba Munisípiu Liquiça, atu evita manipulasaun folin foos iha Liquiça laran.

“Ida-ne’e, ami simu orientasaun hosi Vise-Ministru MTKI,” Salvador  Serão Soares hateten.

Nia dehan, antes ne’e Governu deside serka sanitaria iha Munisípiu Dili hodi taka dalan ba komunidade hotu atu labele tama ba Dili. Tanba ne’e folin sasán iha Merkadu Liquiça sa’e derrepente.

Notísia Relevante : Folin foos sa’e, MTKI Liquiça halo intervensaun

“Ami mai Merkadu Maubara, haree sasán folin iha merkadu ne’e ladún normal tanba foos ida kilograma 20 fa’an ba $15,00. Ida ne’e mak ami avizu ona ba sira katak labele fa’an ho folin hanesan ne’e, bele fa’an ba $12,20 sentavu. Ami hetan tan informasaun balu katak iha suku sira  mós hasa’e folin foos entaun ami foti hotu ona informasaun sira-ne’e ami sei tun direta ba sira-nia fatin,” nia  hateten.

Intervensaun ba merkadu iha Liquiça  ne’e hetan  apoiu  hosi Polísia Nasional Timor-Leste (PNTL) Munisípiu Liquiça, Administradór Munisípiu Liquiça no Administradór Postu Maubara.

Iha fatin hanesan negosiante Vasco Alexandre esklarese katak razaun  sira hasa’e folin foos tanba daudaun ne’e dalan ba Dili taka no sira hola de’it iha merkadu Liquiça mak lori ba fa’an iha Maubara.

“Ami sosa foos iha loja sira iha Liquiça kilograma 25  fa’an ba ami  $14.50 sentavu no bainhira ami sura ho osan transporte nian mai iha Maubara, halo ami hasa’e ba $15,50 sentavu. Ida-ne’e maka realidade,” Vasco Alexandre hateten.

Negosiante homan iha Maubara la hetan rendimentu

Situasaun seluk ba atividade negósiu iha Maubara maka negosiante fa’an sasán homan makerek tradisionál iha Maubara triste tanba durante fulan-rua labele hala’o atividade fan sira nia produtu tanba surtu COVID-19 no serka sanitaria ne’ebé aplika iha Munisípiu Bobonaro ho Dili.

Maria Cabral, negosiante sasán homan, hateten molok serka sanitaria aplika ba Dili no Bobonaro, abitante sira halo movimentu ba mai Dili-Bobonaro, sempre sosa sira-nia produtu.

“Pandemia COVID-19 no desizaun serka sanitaria hamonu kedas ami nia rendimentu,” Maria Cabral  haktuir.

Nia dehan, bainhira atividade paradu sira uza de’it osan hirak ne’ebé antes ne’e hetan hosi sustenta sira-nia nesesidade uma laran, inklui sustenta oan-sira nia presiza ba eskola.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here