PA RAEOA-ZEESM,TL halo diálogu komunitáriu hafoin halo vizita ba sistema diatribuisaun bee-moos Núba’u, segunda (22/03). Imajen/ZEESM,TL

DILI, 22 marsu 2021 (TATOLI)—Prezidente Autoridade (PA) Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM,TL), Arsénio Paixão Bano, ho ninia komitiva vizita sistema distribuisaun bee-moos Núba’u suku Bobo-Case, sub-rejionál Pante Makassar, Oé-cusse.

Vizita ne’e iha ámbitu selebrasaun loron mundiál bee-moos iha 22 marsu, hodi haree oinsá komunidade sira asesu bee-moos no hafoin ne’e halo diálogu komunitáriu.

PA haktuir, iha tinan ne’e autoridade RAEOA tau ona prioridade prinsipál iha planu annuál tinan 2023-2025, atu halo perfurasaun no konstrusaun bee-moos hamutuk hitu to’o 10, tanba ne’e husu entidade relevante asegura serbisu ne’e.

“Servisu Agua Saneamentu iha sub-rejionál haat iha RAEOA ida-idak tenke asegura sira-nia sistema servisu distribuisaun bee-moos atu nune’e komunidade labele halerik tanba bee-moos bainhira iha tempu bai-loron naruk, tanba iha bee mak iha moris,” refere nota ne’ebé Agência TATOLI simu, segunda ne’e.

Iha biban hanesan, populasaun suku Bobo-Case sira agradese ba autoridade no konsidera importante tebes ba suku tolu ne’e atu dezenvolve bee-moos tanba bele fasilita ona nesesidade moris loron-loron.

Nune’e mós, Sekretáriu Rejionál Agrikultura, José Eta, refere ba dekretu-lei númeru 5/2016 kona-ba área protezida fatin neen ho medida ektare 13.000, lokaliza iha bairru Kutete, aldeia Nipani, mensiona mós prezervasaun bee-matan ne’ebé iha.

“Dekretu lei ne’e ko’alia kona-ba sosializasaun perservasaun bee-matan iha RAEOA hamutuk 43, bele  konserva bee-matan no labele ta’a no sunu ai arbiru iha área besik bee-matan. Husu mós kontribuisaun  komunidade tanba importante tebes atu konserva bee-matan sira,” José Eta dehan.

Aleinde ne’e, PA mós asiste asinatura regulamentu ba sistema bee-moos iha Núba’u.

Projetu sistema distribuisaun bee-moos Núba’u hahú harii iha tinan 2009 no ramata iha 2010, ne’ebé fasilita ona bee-mos ba komunidade suku tolu (Bobo-Case, Lalisuk no Cunha) ho totál uma-kain 444, kompostu hosi abitante 2.761.

Iha fatin ne’e, iha mós tanke rezervadór lima no ninia  torneira hamutuk 100, ho totál kustu ba projetu $200.862,25, ne’ebé implementa hosi Grupo Maneger Fasilitador (GMF).

Vizita ne’e akompaña mós hosi sekretária rejionál sira, Xefe Deparatmentu Servisu Agua Saneamentu (SAS), Gil de Sousa, Xefe suku Bobo-Case, Sebastião Cob, Xefe suku Cunha, Domingos Caunan, no Lia-na’in sira iha  Bairro Oé-Foco, aldeia Fatubijae, suku Bobo-Case, sub-rejionál Pante Makassar.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here