Prezidente INSS, Longuinhos Armando Leite. Imajen TATOLI/Egas Cristóvão

DILI, 22 marsu 2021 (TATOLI)—Kontribuisaun seguransa sosiál ne’ebé Institutu Nasionál Seguransa Sosiál (INSS) rekolla durante ne’e hosi benefisáriu, integra ona iha sistema integradu hanaran Real-Time Transfer Network (R-TiMOR).

“Integra iha sistema R-TiMOR atu garante transparánsia, nune’e públiku bele asesu hodi hatene, liuliu kontribuinte sira bele hatene sira-nia osan iha seguransa sosiál ne’e hira ona,” Prezidente Konsellu Administrasaun INSS, Longuinhos Armando Leite, relata ba Agência TATOLI, via telefónika, segunda ne’e.

Nia dehan, razaun integra iha sistema ne’e tanba kontribuisaun ne’e la’ós orsamentu Estadu maibé traballadór nian, tanba ne’e integra iha sistema integradu ida atu entidade hotu bele kontrola.

“Nune’e, ita hotu bele hatene sé lae ema preokupa katak kada fulan ko’a osan maibé lahatene osan ne’e para iha ne’ebé,” nia akresenta.

Notísia relevante: Governu aprova kriasaun fundu rezerva ba seguransa sosiál

Kontribuisaun seguransa sosiál hahú iha outubru 2017 to’o agora, no 16 setembru 2020 Governu estabelese Fundu Rezerva ba Seguransa Sosiál (FRSS).

Objetivu kriasaun fundu atu asegura no iha ligasaun direta ho estabilizasaun finanseira no sustentabilidade rejime kontributivu seguransa sosiál.

Enkuantu, INSS rekolla ona orsamentu hosi seguransa sosiál millaun $93 ne’ebé daudaun iha Banku Sentrál Timor-Leste (BCTL, sigla portugés).

Aleinde ne’e, iha tinan 2020 INSS rejista ona benefisiáriu hamutuk 100.000 no hosi númeru ne’e 47% hosi setór públiku no 53% hosi setór privadu.

Kontribuisaun seguransa sosiál hamutuk 10% hosi totál saláriu benefisáriu kada fulan, ne’ebé kompostu hosi 4% hosi traballadór (benefisiáriu) no 6% hosi empregadór (instituisaun Estadu/na’in ba kompañia).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here