Inan-aman estudante sira iha eskola 1,2,3 Ediri ne’ebé lokaliza iha Aldeia Samanaro, Suku Vatuvou, Postu Administrativu Maubara, Munisípiu Liquiça, hamutuk ho mestre-sira serbisu voluntáriu harii lutu hale’u eskola. Imajen Tatoli/Hortencio Sanchez

LIQUIÇA, 22 marsu 2021 (TATOLI) – Inan-aman  estudante sira iha eskola 1,2,3 Ediri ne’ebé lokaliza iha Aldeia Samanaro, Suku Vatuvou, Postu Administrativu Maubara, Munisípiu Liquiça, hamutuk ho mestre sira serbisu voluntáriu harii  lutu hale’u eskola.

Filomeno Nunes Sampaio, reprezentante inan-aman informa,  ina-aman estudante sira-nian ba eskola ne’e iha mós papél importante hodi kontribui ba dezenvolvimentu no ba oan sira nia futuru.

“Inisiativa ida-ne’e mai rasik hosi ami no kolabora ho mestre sira para halo lutu hale’u eskola. Ita labele laran-metin hodi hein de’it ba Estadu, eskola ne’e ami nian oan sira mak eskola la’ós ema seluk nia oan no labarik sira  ne’e mak futuru ba nasaun,” Filomeno Nunes Sampaio hateten  ba Agência Tatoli bainhira halo serbisu halo lutu hale’u eskola, segunda ne’e.

Nia dehan, lutu ne’ebé halo atu fó seguru mós ba eskola, liu-liu bele proteje animal labele tama ba toba iha resintu eskola nian iha tempu kalan.

Iha fatin hanesan Koordenadora Eskola, Pasquela Pinto Nunes hateten, Eskola ne’e harii iha 2013 hosi Ministériu Edukasaun ho de’it sala aprendizajen tolu no la halo lutu.

Eskola ne’e harii iha 2013 hosi Ministériu Edukasaun ho de’it sala aprendizajen tolu. Imajen Tatoli/Hortencio Sanchez

“Inan-aman  estudante sira nian iha fatin ne’e laran luak tebes hodi ajuda ami mestre sira hodi kolabora hamutuk hodi halo tan eskola ida ho sala tolu hodi kompleta sala neen (6), maibé meza ho kadeira laiha, labarik sira tur de’it iha rai mak tuir aula ne’e mak inan-aman sira mós hakarak halo lutu hale’u eskola ne’e,” Pasquela Pinto Nunes hateten.

Nia haktuir, kontribuisaun inan-aman nian ne’e la’ós hosi halo serbisu de’it, maibé dalaruma ho osan estudante ida $5,00 hodi sosa besi, arame, pregu, kalén hodi harii eskola ho sala tolu.

Alunu sira ne’ebé eskola iha eskola refere hamutuk  na’in-199 hosi primeiru anu to’o sestu anu.  Nune’e mós mestre sira ne’ebé hanorin iha eskola ne’e hamutuk na’in-hitu.

“Difikuldade durante ne’e ami ho alunu sira ne’e hasoru barak loos. Ezemplu maka eskola ida tenke saudavel, mais lutu laiha, animal tama-mai toba no soe hela fo’er  ne’ebé fó impaktu ba labarik sira-nia saúde,”  nia hateten.

Eskola ne’e mós enfrenta laiha bee-moos no sábadu atu fasilita estudante sira fase-liman loron-loron tuir protokolár  Ministériu Saúde nian.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here