Estudante feto ida ne'ebé baku hosi Koordenadór Eskola Ensinu Báziku Filiál 214 Manulete, Suku Koliati Leotelo, Postu Administrativu Hatulia, Munisípiu Ermera. Imajen/Facebook.

DILI, 22 marsu 2021 (TATOLI)—Superintendente Edukasaun Munisípiu Ermera (SEME), Gaspar Monteiro Gomez, fó ona atensaun ba koordenadór Ensinu Báziku Filiál (EBF) 214 Manulete, suku Koliati Leotelo, Postu Administrativu Hatulia, Munisípiu Ermera, ne’ebé halo agresaun fíziku hasoru estudante MdC to’o kanek, iha aula laran.

“Ha’u konsidera ita-nia koordenadór ne’e kontra lei. Ha’u husu ona atu labele repete tan asaun fíziku ne’e, hodi hakanek estudante-sira tanba sei prezudika mós avaliasaun dezempeñu iha futuru,” Gaspar Monteiro Gomez hateten ba jornalista Agência Tatoli via telefónika, segunda ne’e.

Notísia relevante:ME sei investiga kazu hakanek estudante ida iha EBF Manulete

Gaspar Monteiro Gomez bolu atensaun tanba, tuir nia, iha diploma ministériál no dekretu Governu kesi tiha ona dirijente eskola, inklui manorin-sira atu labele aplika aktu fíziku hasoru estudante-sira.

Nia konta-tuir kronolojia katak, kazu ne’e akontese iha sala-de-aula bainhira prosesu aprendizazen la’o hela, no koordenadór ne’e hirus tanba iha estudante na’in-rua ho inisiál RdS no OdJ hadau-malu régua, hodi prezudika fali estudante-sira seluk.

“Ne’e duni, koordenadór ne’e hada’u régua hosi sira na’in-rua hodi baku uluk RdS, depois baku tan OdJ maka régua ai ne’e tohar, katik ba kona fali MdC ne’ebé tuur iha kotuk. Hosi akontesimentu ne’e, rezulta MdC hetan kanek iha ninia rentos no lori kedan ba postu Saúde, hetan suku pontu ida,” nia haktuir.

SEME ho ekipa halo ona investigasaun ba kazu ne’e, no simu mós ezijénsia hosi família MdC ne’ebé husu atu Serbisu Edukasaun Munisípiu Ermera kontinua prosesa kazu ne’e, nune’e bele hanorin koordenadór ne’e, inklui profesór-sira evita atitude violentu hasoru labarik-sira iha futuru.

Nia mós relata liu tan, koordenadór EBF Manulete, Americo Maia, husu ona deskulpa no konfesa katak, nia arrepende ho asaun ne’ebé nia halo ona.

“Koordenadór ne’e mós rekoñese katak, akontesimentu ne’e mosu la’ós tanba ódiu estudante-sira. Maibé, asaun sira ne’e espontánea. Nune’e, nia promete sei la repete tan iha futuru,” Gaspar Monteiro Gomez subliña.

Maski nune’e, dadus ne’ebé SEME rekolla ona sei submete ba Ministériu Edukasaun Joventude no Desportu (MEJD), atu bele hetan desizaun tuir-mai.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here