Adjunta Sekretária Jerál KO25 no atuál Prezidente CNJTL, Maria Dadi Soares Magno. Imajen Tatoli/Antónia Gusmão

DILI, 22 marsu 2021 (TATOLI)—Prezidente Konsellu Nasionál Juventude Timor-Leste (CNJTL-sigla portugés), Maria Dadi Soares Magno, husu Governu tenke esforsu nafatin atu fó apoiu ba juventude sira-ne’ebé kbiit laek, liuliu sira-ne’ebé hela iha ‘kost’ (uma aluga) iha situasaun serka sanitária ne’e nia laran.

Notísia Relevante: Ekipa Posko CNJTL fó apoiu ba estudante sira hela iha “kost”

“Ita akompañia notísia katak Governu tulun ona estudante sira-ne’ebé hela iha ‘kost’ maibé ita haree foin fó apoiu metade de’it. Tanba ne’e, husu Governu tenke esforsu atu juventude sira bele hetan apoiu ai-han iha situasaun serka sanitaria ne’e nia laran”, Maria Dadi Magno Soares hateten ba jornalista sira, iha salaun CNJTL Faról, Dili, segunda ne’e.

Maria Dadi Soares Magno hateten, Governu liuhosi Ministériu Solidaridade Sosiál no Inkluzaun (MSSI) foin mak apoiu estudante hamutuk 2.693, maibé dadus estudante sira-ne’ebé hela iha ‘kost’ kuaze 5.500-resin, entaun presiza ema hotu nia kontribuisaun.

“Presiza ita hotu-hotu nia esforsu atu kontribui. Ohin, Xefe Ekipa Juventude Estudante CNJTL hateten sira-nia parte kontinua apoiu bainhira situasaun la’o nafatin. Maibé desizaun ida-ne’e labele ko’alia retórika de’it maibé tenke iha asaun,” nia dehan.

Aleinde Governu fó apoiu, nia dehan, nia parte fó apresiasaun ba organizasaun RENETIL ne’ebé fó ona espasu ba juventude sira liuliu estudante sira-ne’ebé laiha kbiit, mai hela iha sira-nia edifísiu durante iha situasaun serka sanitaria ne’e nia laran.

“Entaun, CNJTL mós haree ba ida-ne’e no halo intervensaun ne’ebé rápidu tanba juventude sira mós labele hela kleur ho ema barak no oinsá kona-ba sira-nia hahan. Juventude sira-nia moris saudável ka lae. Guvernu presiza haree no toma atensaun ba kestaun ne’e,” nia hateten.

Maria Dadi hateten, daudaun ne’e parte RENETIL mós halo ona reuniaun no iha planu sei halo buat ruma maibé CNJTL mós prontu atu kontribui bainhira RENETIL karik presiza.

“Hirak ne’e hotu, ita-nia apoiu importante iha sira-nia leet mak nafatin fó apoiu morál, korajén atu bele simu realidade ne’ebé ita enfrenta,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here