Prezidente Ezekutivu Komisaun Nasionál Juventude Katólika Timor-Leste (KNJTL), Pe. João Soares. Imajen TATOLI/Jogerjo Guterres.

DILI, 22 marsu 2021 (TATOLI)—Prezidente Ezekutivu Comissão Nasionál Juventude Katólika Timor-Leste (CNJCTL, sigla portugés), Pe. João Soares, hateten CNJCTL halo apoiu solidarieade ho objetivu atu sustentabiliza estudante sira maske iha kurtu prazu maibé mínimu iha sensibilidade atu hatudu solidaridade ba estudante sira.

“Apoiu solidaridade ne’ebé ami halo ne’e hanesan asaun karidade tanba iha situasan disfisil hanesan fanu ita-nia solidaridade. Entaun ami husu ba ema laran-luak sira kontribui foos no supermie Sedaap mai CNJCTL mak ami fasilita hodi kanaliza fali ba estudante sira-ne’ebé hela iha ‘kost’ (uma aluga),” Prezidente Ezekutivu CNJCTL Pe. João Soares informa ba Agência TATOLI liuhosi telefónika, segunda ne’e.

Nia haktuir, kompañia ka organizasaun sira ne’ebé ajuda CNJCTL halo kontribuisaun foos no supermie Sedaap ne’e mak hanesan Asosiaun Xineza iha Timor-Leste, Arqui Dioseze Dili, Grupu Tração Jeep Community, no kompañia EDS.

Prezidente ezekutivu CNJCTL ne’e hateten, bainhira sira hetan apoiu, maneira sira fahe apoiu umanitária ba estudante sira ne’e mak bazeia ba dadus ne’ebé sira rekolla ona ho total estudante hamutuk na’in-413.

“Dadus ne’ebé ami rekolla hosi estudante sira-ne’ebé hela iha ‘kost’ totál ema na’in-413. Entaun, ami fahe haree ba kuantidade ‘kost’ nian hanesan, ‘kost’ mesak ne’e fó foos kilo 12 no supermie Sedaap ne’e falun lima (5). Maibé, estudante sira-ne’ebé hela iha ‘kost’ ida mak mak iha na’in-haat (4), ami fó foos saka ida no supermie Sedaap ne’e falun 10  no na’in-ualu mak hamutuk, ami fó foos saka rua no supermie Sedaap ne’e falun 20,” nia haktuir.

Nia esplika, hosi estudante totál na’in-413 ne’e, ema na’in-300 hetan ona apoiu umanitária no na’in 113 seidauk hetan apoiu tanba estoke sasán nesesidade bázika ne’ebé CNJCTL hetan hosi ema laran-luak sira hotu tiha ona.

“Ami fahe apoiu umanitária hahú iha loron sesta lorokraik (19/03) to’o horisehik domingu ne’e, ami fahe ikus tanba ajuda ne’ebé ami simu hotu ona. Maibé ami esforsu nafatin, nune’e ba oin ami hetan tan apoiu ruma, nune’e bele fasilita apoiu ba ita-nia estudante sira-ne’ebé seidauk hetan ne’e,” Pe. João hateten.

Nia haklaken, apoiu ne’ebé sira halo la’ós oferese de’it ba estudante hosi munisípiu sira ne’ebé daudaun ne’e sira-nia Munisípiu iha lockdown nia laran, maibé sira apoiu ba estudante sira mai hosi munisípiu 12 inklui Rejiaun Administrativa Espesiál Oé-Cusse Ambeno (RAEOA).

“Iha situasaun agora ne’e, la’ós de’it estudante hosi munisípiu balun ne’ebé lockdown ne’e de’it mak presiza tulun maibé estudante hosi munisípiu hotu-hotu inklui RAEOA no Dili. Tanba iha Dili rasik mós sei iha estudante balun ne’ebé inan-aman laiha entaun hamlaha ba hahan ne’e iha. Entaun, haree ba situasaun sira-ne’e, ita fó apoiu ba estudante hotu-hotu,” nia dehan.

Jornalista: Arminda Fonseca

Editór: Cancio Ximenes.

HAKEREK NO HATÁN

Please enter your comment!
Please enter your name here