Xefe Bankada Partidu Demokrátiku (PD), António da Conçeição ‘Kalohan'. Imajen/ Egas Cristovao.

DILI, 22 marsu 2021 (TATOLI)—Bankada Partidu Demokrátiku (PD) iha uma fukun Parlamentu Nasionál (PN) hein VIII Governu Konstitusionál nia esplikasaun kona-ba konseitu atu fó resposta ba sósiu-ekonómika iha vijénsia pandemia COVID-19.

Xefe Bankada Partidu Demokrátiku, Deputadu António da Conceição ‘Kalohan’, hateten preparasaun resposta sósiu-ekonómika ba efeitu COVID-19 hodi apoia umanitáriu, ekonómiku no sosiál ne’e kna’ar ezekutivu nian.

Maibe, tuir nia, buat importante ida atu nota mak orsamentu ne’e anuál, katak tinan ida dala-ida no Orsamentu Jerál Estadu (OJE) 2021 aprovadu tuir tempu no hetan mós promulgasaun hosi Prezidente Repúblika no oras ne’e foin tama trimestre dahuluk.

“Se agora Governu iha hanoin atu halo fali programa no orsamentu ne’e signifika Governu hakarak halo retifikativu iha OJE 2021. Maibé, ha’u-nia hanoin sedu liu iha primeiru trimestre ita ko’alia ona orsamentu retifikativu. Se Governu hanoin atu halo presiza haree to’o iha-ne’ebé ona ezekusaun orsamentu atuál hodi fo esplikasaun ida iha parlamentu molok hanoin atu halo fali planu no programa iha tinan hanesan. Ami hein Governu nia esplikasaun,” Deputadu Kalohan informa ba Agência TATOLI, iha Parlamentu Nasionál, segunda ne’e.

Bankada PD iha debate OJE 2021 liubá aprezenta proposta lubuk hodi reforsa agrikultura, reforsa kapitál kréditu ba agrikultór no setór privadu maibé proposta hirak ne’e la hetan apoia hosi Governu.

PD hanoin, rekuperasaun ekonómika tenke konsentra ba setór agrikultura no Turizmu, maibé Governu rezeita hanoin ne’e hodi implementa cesta bázika ho razaun asegura hahan ba família mak di’ak liu tanba ne’e maioria la aseita PD nia hanoin.

Nia dehan, prosesu atu responde apoia umanitária, ekonómiku no sosiál ne’e politikamente Governu nia kna’ar.

“Hanesan bankada opozisaun, ami hakarak haree konseitu saida mak Ministériu Solidariedade Sosiál no Inkluzaun (MSSI) ne’e iha hodi haree ba asuntu umanitáriu. Ami mós hanoin papél Ministru Koordenadór ba Asuntu Ekonómiku nian loloos haree liubá oinsá atu dezenvolve polítika ekonomia nian. Maibé, ami lamenta tanba politika dezenvolve ekonomia nian ladún mosu maibé halo fali mak atividade sosiál nian,” Xefe Bankada Demokrátiku ne’e kestiona.

Nia haktuir, Ministeriu Solidariedade Sosial no Inkluzaun (MSSI) nia kna’ar lakon ho ministériu sira-ne’ebé hanoin atu dezenvolve ekonomia ne’ebé hala’o fali papél MSSI nian.

“Ne’eduni, ami hein Governu nia esplikasaun (konseitu sósiu-ekonómiku) tanba rekuperasaun ekonómika ne’ebé Governu hanoin ho Cesta Bázika ne’e atuasaun ida-ne’ebé hamosu dependénsia, fó oportunidade ba ema ne’ebé tuur hein atu foti lukru de’it. Agrikultór la sai na’in ba nia produtu maibé sai objetu ba sira-ne’ebé mak iha loza no kompañia de’it,” Xefe Bankada PD hateten.

Eis Ministru Komérsiu, Indústria no Ambiente ne’e fó hanoin ba Governu atu hamosu atividade empregu kurtu prazu nian ne’ebé bele fó benefísiu ba ema barak.

“Se ha’u bele dehan Governu bele aproveita polítika IV Governu nian hanesan halo pakote referendu ne’e. Ne’e programa ne’ebé hakbiit emprezáriu maibé fo oportunidade servisu ba povu. Maibé ha’u la husu atu Governu ne’e kópia Governu uluk nia programa. Governu bele hanoin nia konseitu hodi aprezenta ba Parlamentu,” nia akresenta.

Eis Ministru Edukasaun ne’e mós konsidera programa cesta bázika laiha efeitu iha rekuperasaun ekonómika tanba hamosu inflasaun iha merkadu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here