Plenaria Parlamentu Nasional. Imajen Tatoli Antonio Goncalves.

DILI, 22 marsu 2021 (TATOLI)—Bankada Frente Revolusionária Timor-Leste Independente (FRETILIN) iha uma fukun Parlamentu Nasionál husu ema hotu inklui Eis Prezidente Repúblika, Kay Rala Xanana Gusmão, tenke respeita desizaun Estadu nian kona-ba regra Estadu Emerjénsia.

Xefe Bankada FRETILIN, Deputadu Francisco Miranda Branco, esplika Timoroan liu rihun-atus-rua ne’ebé fó isin no raan hodi harii Estadu ida-ne’e, tanba ne’e desizaun hosi Estadu dekreta estadu emerjénsia liuliu aplika serka sanitaria no konfinamentu domisiliáriu iha kapitál ema hotu tenke kumpri.

“Ami haree no asiste katak ema balu halo rezisténsia hasoru desizaun estadu nian hodi dehan COVID-19 ne’e polítika de’it, piór liután kuandu deklarasaun sira-ne’e sai hosi líder boot nasaun nian. Ha’u sita señor Xanana Gusmão nia deklarasaun hodi halo rezisténsia kona-ba estadu emerjénsia ne’e polítika de’it, ha’u hanoin presiza kurije situasaun ne’e. Ne’e desizaun estadu nian tanba ne’e ita hotu presiza hakru’uk ba desizaun ne’e, laiha esesaun,” Xefe Bankada FRETILIN ne’e levanta liuhosi plenária, Parlamentu Nasionál, segunda ne’e.

Nia dehan, estadu ne’e la’ós ema ida nian maibé estadu ida-ne’e Povu Timor-Leste tomak nian no labele halo estadu ida-ne’e sai fali proprieade privadu

“Ami rejista ho rejista boot. Favór, hakru’uk ba estadu nia desizaun,” Xefe Bankada FRETILIN hateten.

Hatán ba kestaun ne’e, Vise-Xefe Bankada Congresso Nacional de Reconstrução de Timorense (CNRT), Deputadu Patrocínio Fernandes dos Reis, rejeita deklarasaun ne’e tanba ne’e durante ne’e Xanana Gusmão la ko’alia COVID-19-ne’e polítika.

“Ami 24 horas akompaña mídia hotu-hotu, ami seidauk hetan deklarasaun hosi Maun Xanana nian ko’alia kona-ba dehan COVID-19 ne’e polítika, ami desmente. Ami konsidera deklarasaun Bankada FRETILIN nian barratu,” Vise-Xefe Bankada CNRT ne’e subliña.

Vise-Xefe Bankada CNRT rejeita deklarasaun Bankada FRETILIN ne’e akuza Xanana privatiza estadu iha vijénsia COVID-19 ne’e.

“Akuza maun Xanana privatiza estadu, ne’e deklarasaun ne’ebé infantil liu, tanba bainhira ko’alia kona-ba estadu direitu demokrátiku ne’e tenke fó ezemplu iha sira-nia atuasaun polítika,” nia katak.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here