Produtu Cesta Bázika. Imajen TATOLI/Antónia Gusmão.

DILI, 21 marsu (TATOLI)–Xefe suku Gariuai, postu administrativu Baucau Villa, munisípiu Baucau, Arlindo Belo, informa, suku ne’e iha ona lista reklamasaun ne’ebé submete ona ba autoridade munisípiu Baucau hodi prosesa.

“Ha’u-nia populasaun iha suku Gariuai simu hotu ona Cesta Bázika, maibé sei iha reklamasaun hamutuk 49 tanba naran la sai, maibé lista ne’e entrega ona ba autoridade,” Xefe Suku Gariuai hateten ba Agência TATOLI, via telefónika, domingu ne’e.

Notísia relevante: Distribuisaun Cesta Bázika iha Baucau no Viqueque hapara provizóriu

Maski nune’e, líder komunitáriu ne’e garante katak populasaun sei simu direitu hanesan, ne’ebé halo ona aprosimasaun ho Sentru Lojíztika Nasionál (CLN, sigla portugés).

“Ha’u fiar katak reklamasaun sira ne’e sei simu hotu tanba ha’u rasik ko’alia ona ho CLN, maibé tuir prosesu hotu tanba suku iha Baucau Villa balun seidauk simu hotu, bainhira distribuisaun iha suku hotu ramata mak atende fali lista reklamasaun sira,” nia akresenta.

Totál populasaun ne’ebé simu ona hamutuk 7.403 hosi aldeia Bahamori, Cairiri, Darasula, Gariuai, Maucale, Uaibehana, Uatu-Ua, Uaturau.

“Hosi reklamasaun 49 suku Gariuai, kada aldeia iha ema na’in tolu ka haat de’it mak seidauk simu,” nia hatutan.

Antes ne’e, Governu liuhosi Ministériu Koodenadór Asuntu Ekonómia (MKAE) deside hapara provizóriu distribuisaun Cesta Bázika iha munisípiu Baucau no Viqueque, relasiona ho rezolusaun Governu atu aplika serka sanitária no konfinamentu domisiliáriu iha munisípiu rua ne’e, hahú loron 16 to’o 29 marsu.

Jornalista: Osória Marques

Editora: Julia Chatarina

HAKEREK NO HATÁN

Please enter your comment!
Please enter your name here