Segundu Komandante Polísia munisípiu Dili, Superintendente Euclides Belo. Imajen TATOLI/ António Gonçalves

DILI, 21 marsu 2021 (TATOLI)–Polísia Nasionál Timor-Leste (PNTL) munisípiu Dili, iha domingu ne’e, detein abitante na’in-13 kompostu hosi mane 12 no feto ida hosi Dili, ne’ebé tenta desloka bá munisípiu iha parte leste nian.

Segundu Komandante PNTL munisípiu Dili, Superintendente Euclides Belo, hateten, membru Polísia ne’ebé halo seguransa iha área Metinaro la konsege deteta tanba abitante sira halo movimentu iha kalan boot ho motorizada, maibé hafoin hetan informasaun, komunika ba Komandu Polísia munisípiu Manatuto, nune’e bainhira sira to’o iha Manatuto Villa mak Polísia foin detein iha tuku 01:00 madrugada.

“Deslokasaun abitante hirak ne’e laiha autorizasaun hosi Sala Situasaun Sentru Integradu Jestaun Krize (CIGC, sigla portugés), ne’ebé sira sai hosi Dili liu dalan ki’ik iha área Metinaro nian no tama bá Laclo atu bá munisípiu sira iha parte leste hanesan Manatuto, Baucau no Lautém, ne’ebé sai hosi Dili, iha sabadu (20/03) kalan boot,” Superintendente Euclides Belo informa ba Agência TATOLI, via telefónika, domingu ne’e.

Notísia relevante: CIGC autoriza sidadaun bá munisípiu ho aprezenta razaun- teste swab

Nune’e, iha tuku 02:00  madrugada, Komandu Polísia munisípiu Manatuto akompaña hodi entrega abitante sira ba Polísia Eskuadra Metinaro.

“Daudaun sira submete hela ba prosesu identifikasaun no mós hein médiku sira halo teste swab,” nia akresenta.

Aleinde ne’e, Polísia rekolla evidénsia motor hitu iha serka sanitariterrenu, ne’ebé abitante sira utiliza halo movimentasaun.

“Polísia halo identifikasaun hodi hatene motivu movimentu ne’,  tanba viola no la obedese regra implementasaun serka sanitária,” nia hatutan.

Antes ne’e Governu hasai rezolusaun ne’ebé impoin serka sanitária no konfinamentu obrigatóriu iha munisípiu Dili hahú loron 16 marsu to’o 02 abríl no ba munisípiu Baucau no Viqueque hahú loron 16 to’o 29 marsu, tanba haree ba evolusaun COVID-19 no atu fó biban ba ekipa saúde buka kontaktu besik vírus ne’e.

Maski nune’e, Governu autoriza movimentu ema ho sasán, ba nesesidade emerjénsia maibé tenke iha karta autorizasaun hosi CIGC, ne’ebé aprezenta razaun forte deslokasaun no rezultadu teste swab.  

Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here