Uma-lisan sira iha Postu Administrativu Laga, Munisípiu Baucau. Imajen/Foti hosi Globtroter.pl

DILI, 20 marsu 2021 (TATOLI)– Xefe Suku Tekinomata, Postu Administrativu Laga, Munisípiu Baucau, Cipriano Arlindo Ximenes, informa komunidade iha Aldeia Caicasalari ne’ebé pertense ba nia suku seidauk simu Cesta Bázika tanba produtu lokál menus bainhira distribui hela ba aldeia tolu seluk.

“Iha ha’u-nia suku Tekinomata ne’e Aldeia Caicasalari mak seidauk simu Cesta Bázika, tanba produtu lokál menus, maibé aldeia Itida’a ho Kuluguia simu hotu ona no Samagia maka sei falta uma-kain neen (6) seidauk simu,” Xefe Suku Cipriano Arlindo Ximenes, informa ba Agência Tatoli liuhosi telefónika, sábadu ne’e.

Notísia Relevante : Distribuisaun Cesta Bázika iha Baucau no Viqueque hapara provizóriu

Xefe Suku ne’e halo esforsu nafatin atu ninia populasaun ne’ebé seidauk simu Cesta Bázika ne’e, bele simu hotu hanesan ho sira seluk tanba programa Cesta Bázika ne’e pertense ba direitu Timor-oan hotu nian ne’ebé konsagra iha polítika rekuperasaun ekonómika hosi Estadu iha pandemia COVID-19.

“Ha’u kontinua tenta kontaktu ho parte Diretór Jerál Sentru Lojístika Nasionál (CLN) no sira hateten sasán iha ona atu lori ba, maibé tanba serka sanitária hela ba Munisípiu Baucau ho Dili, entaun labele kontinua distribui, maibé bainhira liu tiha ida-ne’e maka kontinua halo fali distribuisaun ba família ne’ebé seidauk simu,” Xefe Suku Tekinomata ne’e haktuir.

Sasán ka ai-han sira fahe ba komunidade sira iha programa Cesta Bazika ba Suku Tekinomata maka hanesan, fore-keli, fore-rai, fore-mungu, batar-uut, batar-ikis, sabaun, pastadente, eskova nehan nian, rinso, mina, foos no seluk tan.

Númeru totál xefe família ne’ebé rejistu iha Suku Tekinomata hamutuk 547, kompostu hosi xefe família iha Aldeia Caicasalari 177, Samagia (135), Itida’a (126) no Aldeia Kulugia hamutuk xefe família 109.

Jornalista   :  Osória Marques

Editór         :  Francisco Simões

HAKEREK NO HATÁN

Please enter your comment!
Please enter your name here