Vise-Prezidente Bankada KHUNTO, Deputadu António Verdial de Sousa. Imajen/Espesiál.

DILI, 20 marsu 2021 (TATOLI)—Vise-Prezidente Bankada Kmanek Haburas Unidade Nacional Timor Oan (KHUNTO), Deputadu António Verdiál de Sousa, propoin dalan haat (4) ba VIII Governu Konstitusionál kona-ba resposta sósiu-ekonómika iha rai-laran nune’e planu ne’e la’o ho efetivu.

“Governu tenke halo planu ho efetiva ba rekuperasaun roda ekonomia liuhosi dalan haat (4) mak hanesan, labele taka dalan ba importasaun no eksportasaun, reforsa produsaun agríkultura, reforsa distribuisaun produsaun foos no reforsa imput suplay ba materiál no item hotu ne’ebé presiza tebes hodi hadi’a ekonomia iha nasaun Timor Leste,” Deputadu António Verdiál de Sousa informa ba  Agência TATOLI, liuhosi telefónika, sábadu ne’e.

Prezidente Komisaun G ne’e hatutan, situasaun atuál roda ekonomia la’o ladún saudável entaun oinsá mak Governu foti asaun ida-ne’ebé di’ak hodi bele responde ba problema sosiu-ekonomia iha Timor-Leste bele la’o normál fali, maske iha tempu ne’ebé mundu tomak inklui Timor-Leste sente ladún konfortável.

Nia hateten, konseitu ba rekuperasaun ekonómika ne’ebé nesesária ba nasaun Timor-Leste, viábel liu maka kontinua ho serka sanitária no konfinamentu obrigatória iha área fronteriza, hanesan terrestre, portu no aeroportu, espesialmente ba movimentu ema tama no sai.

“Serka sanitária ne’ebé bandu buat hotu, la la’o, asaun ida-ne’e ladún efetivu iha parte ekonomia. Di’ak ba parte saúde maibé kuandu ita bandu negósiu ki’ik no bo’ot ne’ebé hala’o sira-nian negósiu kona-ba ai-haan no nesesidade importante seluk atu ema labele asesu bá, klaru, ita kria problema seluk no problema ekonomia,” nia dehan.

Atu rekupera fali ekonomia, nia dehan, Governu tenke hatuur planu ne’ebé efetivu no halo regulamentu ne’ebé forte hodi regula atividade ne’ebé la’o daudaun, nune’e mós Governu tenke kontrola tomak atu bele atinje rekuperasaun ekonómika.

Bankada KHUNTO propoin mós ba parte ezekutivu, kontinua ho serka sanitária maibé tenke husik povu livre hodi lori produtu ai-haan fresku mai Dili no hosi Dili ba munisípiu 12 inklui Rejiaun Administrativa Espesiál Oé-Cusse-Ambeno (RAEOA) no illa Ataúro no Jaco.

Jornalista: Evaristo Soares Martins

Editór: Cancio Ximenes 

1 KOMENTÁRIU

HAKEREK NO HATÁN

Please enter your comment!
Please enter your name here