Diretór Ezekutivu Asosiasaun HAK, Xisto dos Santos. Imajen TATOLI/Egas Cristovão.

DILI, 20 marsu 2021 (TATOLI)- Iha ámbitu implementasaun serka sanitaria no konfinamentu domisiliáriu lori nia impaktu sosiál ba komunidade sira, liuliu estudante sira ne’ebé mai hosi munisípiu no aluga uma ka kost iha kapitál Dili.

Estudante sira maioria mai hosi munisípiu hela iha kost no balun hela ho família alias tiun ka tian ho maun sira, maibé hirak ne’ebé la iha família iha Dili tenke aluga uma ka kost. Ironia tebes. Iha serka sanitaria ne’e, sira labele ona sai hosi Dili ba sira-nia munisípiu atu foti bukae ai-han ka osan tanba ne’e prejudika sira-nia nesesidade báziku, inklui prejudika sira atu hetan osan seluk kost.

Haree ba situasaun inkrivel ne’e, Asosiasaun HAK hamutuk ho nia parseiru sira hanesan TAPSA, KSI, PERMATIL, MDI, AJAR, ACbit, JSMP, Grupu Estudo de Direito, RDDU, indivíduu no ativista sira, hola inisiativa umanidade halo  asaun karitativa hodi apoiu nesesidade báziku tuir ne’ebé kbiit ba estudante sira ne’ebé aluga uma ka kost iha Dili laran.

Diretór Ezekutivu Asosiasaun Direitu Umanu (HAK), Sisto dos Santos hateten, apoiu umanitária ne’ebé sira halo laiha intensaun seluk, maibé nu’udár sentimentu solidariedade ba estudante sira iha situasaun krusiál hanesan ne’e.

“Kontribui solidariamente ne’ebé ami halo hosi aspetu umanu nian, tanba situasaun difisil hanesan ne’e ita la taka matan ba ita-nia alin estudante sira ne’ebé mak terus ba ai-han, tanba sira mak futuru nasaun nian, entaun ida ne’e fanu ita-nia solidariedade, maibé tanba la’ós projetu,” Sisto dos Santos, esklarese ba Agência Tatoli, iha nia knaar fatin, Faról, Dili, sesta (19/03).

Nia dehan, haree ba situasaun sira ne’e HAk ho nia parseiru no membru sira foti inisiativa ne’ebé mak imediatamente no urjentemente halo asaun solidariedade liuhosi apoiu umanitária.

Bainhira, Asosiasaun HAK ho parseiru rona estudante barak mak hela iha uma kost no hahán laiha balu loron tomak la han, no balun dependente de’it ba viziñu no balu to’o fa’an sira-nia telefone atu hetan hahán aguenta moris, ne’e situasaun ida krusiál tebes no presiza duni apoia malu.

Nia informa  apoiu umanitária ne’ebé sira halo hahú iha kuarta to’o kinta (17-18/03),  ba lista provizóriu estudante hamutuk 253 no sei kontinua asaun solidariedade ne’e ba estudante sira ne’ebé presiza duni.

Sasán nesesidade sira ne’ebé HAK ho nia parseiru apoia ba estudante sira hela iha kost mak hanesan  foos, mina no supermie sedaap.

Jornalista  : Arminda Fonseca

Editór         : Francisco Simões 

 

HAKEREK NO HATÁN

Please enter your comment!
Please enter your name here