Membru Bankada CNRT, Carmelita Caetano Moniz. Imajen/Tatoli Egas. Cristovao

DILI, 19 marsu 2021 (TATOLI)—Reprezentante Povu iha uma fukun Parlamentu Nasionál, husu Governu aselera pagamentu ba empreza fornesimentu programa cesta bázika.

“Governu presiza halo levantamentu hosi fundu petrolíferu. Se Governu dehan osan ne’e ka sei barak hela, la presiza halo levantamentu ba fundu petrolíferu entaun ami husu favór ho haraik-aan nu’udar opozisaun husu ba Governu katak halo ona pagamentu ba dívida naun-finanseira hanesan servisu públiku ne’ebé kompañia sira fornese ba Estadu ida-ne’e, se dehan osan ne’e iha,” Deputada Bankada CNRT, Carmelita Caetano Moniz, informa ba jornalista sira, iha resintu Parlamentu Nasionál, sesta ne’e.

Nia informa, osan iha konta tezouru ne’e hela de’it ona millaun $59,7, tanba ne’e nota liuhosi portal transparénsia Ministériu Finansa nian.

Ba asuntu ne’e, nia husu Governu presiza esklarese ba públiku ho klaru loloos katak osan ne’e iha hira no depois pagamentu ne’e la halo ne’e ninia difikuldade iha-ne’ebé, nune’e ema hotu-hotu labele loron-kalan mak sisi hela de’it Governu ne’e liuhosi mídia sosiál.

“Ita haree emprezáriu Timoroan sira loron kalan-halerik, hodi hein sira-nia pagamentu. Nune’e mós pagamentu ba liña frente balun seidauk hetan pagamentu to’o agora, uluk dehan fulan-tolu to’o ikus selu fulan-rua de’it. Subsídiu ba reklamante $200, forsa no polísia balun to’o agora seidauk simu alimentasaun. Tanbasá mak balun selu no balun la selu,”  nia dehan.

Nia afirma, sé Governu osan iha, halo favór ezekuta ona ba, labele haterus kompañia fornesedór ba programa cesta bázika ne’e.

“Agora Governu dehan osan iha no bankada Governu mós dehan osan sufisiente. Governu sempre dehan osan sei sufisiente, la presiza foti osan hosi fundu petrolíferu no agora daudaun Governu liuhosi Sekretáriu Estadu Komunikasaun Sosiál, Mericio dehan, Governu ida-ne’e halo polítika foti osan uitoan-uitoan,” nia hateten.

Eis Prezidente Komisaun A (Justisa no Konstisionál) ne’e akresenta, sé foti osan uitoan-uitoan mós tenke tuir nesesidade rai ida-ne’e nian, nune’e halo ona pagamentu ba ema sira-ne’ebé fornese ona servisu ba Estadu ida-ne’e.

“Ne’e mak ita-nia lójika ne’e ita bele simu. Ida tama iha obrigasaun ne’e halo ona pagamentu ba, tanba ne’e tama ona iha pagamentu iha prosesu CPV. Sira iha komitmentu ne’e prosesa lalais tama ba obrigasaun hodi halo ona pagamentu,” nia fó hanoin  ba Governu.

Deputada Bankada CNRT, Carmelita Caetano Moniz, monitoriza liuhosi portál transparénsia ezekusaun orsamentál atinje ona 19.5% reprezenta montante osan hamutuk $465,318,411.63 hosi Orsamentu Jerál Estadu (OJE) 2021 totál hamutuk $1,895,000,000.00.

Deputada Bankada CNRT ne’e haktuir, iha loron 05 janeiru 2021 Ministru Finansa Rui Gomes dehan, saldo tezouro (líquidez-likuiditas) totál osan hamutuk $325,000,000.00 mak sei iha saldo hodi bele selu nesesidade kurtu-prazu nian, inklui deve sira.

Iha loron 23 fevereiru 2021, tuir informasaun hosi Banku Sentrál Timor-Leste (BCTL-sigla portugés) katak tranfere ona osan Fundu Petrolíferu hamutuk $200,000,000.

Eis Prezidente Komisaun A ne’e dehan, totál osan loloos hahú hosi fulan-janeiru to’o marsu 2021 depois konta ho levantamentu iha tinan 2021 hamutuk $525,000,000.

Maibé Bankada CNRT haree hosi ezekusaun to’o loron 17 marsu gasta ona osan hamutuk $465,318,411.63.

“Signifika ita-nia líquidez (saldu agora) hela de’it  $59,681,588.37  (miliaun $59,7). Seraké iha fulan-marsu 2021 ida-ne’e seidauk iha nesesidade atu halo levantamentu foun ba Fundu Petrolíferu ba OJE 2021. Tanba ita-nia saldo agora hela de’it Miliaun $59,7,” Deputada Carmelita Caetano Moniz esplika.

Hatán ba preokupasaun ne’e, Prezidente Komisaun C (Finansa Públika), Deputada Maria Angélica Rangel, esplika Governu foin halo levantamentu iha 23 fevereiru ho montante millaun $200.

“Ita-nia saldo iha tezouru ho atualizadu millaun $321,2 hosi montante biliaun $1.895 ne’ebé mak Parlamentu Nasionál aprova. Oras ne’e, Governu ezekuta ona iha primeiru trimestre millaun $284. Signifika orsamentu sei sufisiente hela,” Prezidente Komisaun C ne’e fundamenta.

Jornalista: Evaristo Soares Martins   

Editór: Cancio Ximenes 

HAKEREK NO HATÁN

Please enter your comment!
Please enter your name here