Pasiente dengue. Imajen/foti hosi Google

DILI, 20 marsu 2021 (TATOLI)– Sentru Saúde Munisípiu Ermera rejistu kazu dengue ba labarik hamutuk 33 no pasiente na’in-10 evakua ona mai halo tratamentu intensivu iha Ospitál Nasionál Guido Valadares (HNGV).

“Hosi fulan janeiru-marsu, tinan ne’e, ami rejistu kazu dengue hamutuk 33 ne’ebé afeta ba ita-nia labarik sira. Maibé labarik 10-resin mak ami transfere ona ba Ospitál Dili, tanba labarik sira ne’e isin manas maka’as, isin-lolon sira mosu musan-musan mean no ran sai hosi inus,” diretór Sentru Saúde Munisípiu Ermera, António de Deus Fátima, informa ba Agência Tatoli liuhosi telefónika, sábadu ne’e.

Informasaun ne’ebé Sentru Saúde Ermera  simu hosi HNGV katak pasiente dengue na’in-10 ne’e ultrapasa ona no kontinua observasaun  atu rekupera.

Ho kazu dengue ne’ebé rejistu aas maka Sentru Saúde Ermera halo intervensaun rápidu ho abatizasaun hodi hamate susuk nia tolun, ne’e ba uma-kain purvolta 700 no halo sensibilizasaun ba komunidade atu oinsá moris iha saudavel no kumpre prosedimentu sira hosi saúde oinsá mak prevene dengue iha família.

Medida prevensaun dengue

Medida sira simples prevene moras dengue liuhosi asaun sira hanesan hamoos fatin sira ne’ebé bee-nalihun ba, hanesan bee iha vazu ai-fuan, bee iha roda laran, bee iha botir laran, hamoos duut ne’ebé moris besik iha hela fatin, haloot sasán sira iha uma-laran no mós li’ur, uza moskiteiru ka toba iha moskiteiru laran, uza faru no kalsa naruk bainhira halo atividade iha fatin sira ne’ebé nakonu ho susuk, uza ai-moruk anti-susuk hanesan autan, ai-moruk ne’ebé uza hodi rega (Baygon no Hit, nst), ai-moruk Abate ne’ebé tau iha bee-laran (la’ós bee hemu) no husu tulun ba iha serbisu saúde ne’ebé besik atu bele halo fumigasaun (rega susuk) iha bairru laran

Dengue ka iha lian indonéziu katak deman berdarah, bainhira tempu udan, mosu moras oioin ne’ebé dala barak halo ema susar atu maneja. Dengue hanesan moras ida hosi moras sira seluk ne’ebé mak fasilmente hasoru iha tempu udan.

Dengue mak moras ida ne’ebé kauza hosi virus ida ho naran dengue, virus dengue lori hosi susuk ho naran Aedes aegypti. Susuk Aedes aegypti moris iha ambiente ho klima tropical (signifika iha de’it temporada rua hanesan bai-loron no udan) hanesan Timor.

Susuk Aedes aegypti hahú nia síkulu  moris nian bainhira susuk inan (femea) hahú tolun, fatin ne’ebé di’ak tebes ba susuk ne’e atu tolun mak iha bee-nalihun sira. Liu tiha loron hitu (7) tolun sira ne’e sei nakfera no forma larva (ular ki’ik oan ne’ebé dala barak ita hetan iha bee-lihun sira).

Larva moris no sai pupa (kepompong), no liu tiha loron rua (2) nia forma kompletamente sai susuk Aedes aegypti no prontu ona atu infeta ka tata ema ho virus dengue.

Tuir estudu públiku iha siénsia saúde katak virus dengue iha tipu haat, maka  hanesan DEN-1, DEN-2, DEN-3 no DEN-4.

Dengue mosu (Patofisiologia)

Bainhira susuk Aedes aegypti (vetór) tata ema (hospede principal), nia hatama mós serotypes (virus dengue) mai ema nia isin liuhosi ninia kaben. Virus dengue sei tama no halai tuir ema-nia sirkulasaun sanguine (ran halai fatin). Hafoin, virus dengue sei invade leucocitos (ran mutin) no sei replika ka hafahe nia aan hodi halo barak.

Bainhira virus dengue ne’e tama no replika ona iha ema nia órgaun laran, maka ema nia isin sei responde ba virus ne’e, ne’ebé sei hamosu sinál sira hanesan isin-manas, ruin no isin moras no seluk-seluk tan.

Bainhira  replikasaun virus dengue nian aumenta , virus refere bele invade órgaun sira hanesan fuan, medula osea (sum-sum tulang) no se la hapara lalais virus ne’e nia replikasaun, bele rezulta dengue hemaragia (isin manas akompaña ho ran sai hosi inus no nehan isin) no se la halo tratamentu lalais bele hamate ema.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here