Deputadu Bankada FRETILIN, Francisco Miranda Branco. Imajen Tatoli/Jogerjo Guterres

DILI, 20 marsu 2021 (TATOLI)—Bankada Frente Revolusionária Timor-Leste Independente (FRETILIN) no Bankada Congresso Nacional de Reconstrução de Timorense (CNRT) diferensa ideia kona-ba preparasaun Governu nian hodi fó resposta ba sósiu-ekonómika iha Timor-Leste.

Xefe Bankada FRETILIN, Deputadu Francisco Miranda Branco, esplika planu ne’e presiza fó resposta ho urjénsia ba  estudante sira-ne’ebé eskola iha Dili iha ámbitu serka sanitária no konfinamentu obrigatóriu ne’e.

Nia dehan, hosi parte Ministériu Solidariedade Sosiál no Inkluzaun (MSSI) bele identifika daudaun estudante sira-ne’ebé aluga uma iha Dili no identifika populasaun ne’ebé vulnerável liu.

Nune’e mós presiza estabelese kurridór ida entre kapitál Dili no munisípiu sira maibé tenke kontinua monitoriza hosi atendimentu servisu saúde públika nian no seguransa.

Nia fó ezemplu, daudaun ne’e iha ona espasu kanaliza produtu sira-ne’ebé iha munisípiu mai Kapitál Dili, nune’e mós hosi kapitál munisípiu seluk ba munisípiu seluk hanesan produtu modo, ai-fuan no nesesidade bázika sira seluk.

“Ha’u hanoin ida-ne’e urjente, di’akliu komesa sedu para ita-nia merkadu sira-ne’e mós iha hodi konsumidór sira bele hetan nafatin produtu alimentár, modo ho buat seluk ne’ebé ita-nia konsumidór sira iha,” Xefe Bankada FRETILIN ne’e informa ba Agência TATOLI, iha Parlamentu Nasionál, sesta ne’e.

Nia fundamenta, planu hodi fó resposta ba sósiu-ekonómika ne’e hatudu ona esperiénsia hosi nasaun sira seluk tanba ne’e nesesária ba Timor-Leste atu adapta.

“Ami hanoin katak ienke iha resposta ida ho adekuadu ba situasaun atuál. Ne’e la’ós ita Timor de’it maibé nasaun seluk mós iha alternativa sira hanesan ne’e, tanba situasaun ne’e espesiál entaun tenke buka resposta ida espesiál duni atu responde ba situasaun ne’e,” nia fó hanoin ba Governu.

Bankada FRETILIN propoin ba Governu bele iha tán orsamentu suplementár ida tanba gráfiku pozitivu COVID-19 ne’e kontinua aumenta, entaun sei fó impaktu situasaun ekonómika.

Deputadu Patrocínio dos Reis Fernandes. Imajen/Espesial.

Entretantu, Vise-Xefe Bankada CNRT, Deputadu Patrocício dos Reis Fernandes, husu Governu rezolve uluk dívida naun-finanseira sira iha programa cesta bázika molok implementa tán planu sósiu-ekonómika.

“Ne’e maneira atu soe rai rahun ba povu nia matan. Governu iha hela situasaun pániku nia laran, problema COVID-19, problema implementasaun cesta bázika, problema kompañia sira-nia osan la selu, problema funsionáriu sira la simu osan. Buat sira-ne’e hotu Governu iha hela situasaun pániku nia laran, ne’e hanesan isue ida atu kari tiha ba públiku nia matan atu bele taka hela katak Governu iha hela situasaun normál,” Vise-Xefe Bankada CNRT ne’e informa ba Agência TATOLI.

Nia argumenta, polítika hotu-hotu introdús iha dokumentu ofisiál iha programa Governu nian ba tinan lima nian depois trasa ba iha planu asaun anuál maka bele refleta iha Orsamentu Jerál Estadu.

Nia dehan, OJE 2021 mós sai polémika boot iha públiku kona-ba ninia ezekusaun, agora ko’alia tán fali planu sósiu-ekonómiku.

Bankada CNRT konsidera planu resposta sósiu-ekonómika ne’e nu’udar maneira ida governu soe rai-rahun hodi dezvia tiha ema-nia atensaun katak ema labele hatene Governu iha situasaun pániku.

“Solusaun, Governu tenke iha kapasidade atu ezekuta tanba orsamentu 2021 aprovadu no promulgadu. Se Plataforma entendimentu tolu ne’e laiha entendimentu, di’ak liu fó-sai ba públiku katak la intende malu, tanba OJE 2021 boot tebes. Problema iha-ne’ebé mak labele rezolve problema sira-ne’e,” Vise-Xefe Bankada CNRT ne’e hateten.

Jornalista: Evaristo Soares Martins

Editór: Cancio Ximenes 

HAKEREK NO HATÁN

Please enter your comment!
Please enter your name here