Pesoál Saneamentu Munisípiu Dili ne'ebé hetan baku hosi Ajente Xefe Polísia ho inisiál TX . Imajen/Foti hosi Facebook

DILI, 19 marsu 2021 (TATOLI)-Komandu Jerál Polísia Nasionál Timor-Leste (PNTL) loke investigasaun ba Ajente Xefe Polísia ho inisiál TX ne’ebé halo agresaun fízika hasoru pesoál saneamentu ida iha Taibesi, Dili.

Kazu agresaun fíziku hosi membru PNTL ba pesoál Saneamentu Munisípiu Dili  ne’e  akontese iha kinta (18/03), tuku 10:40 dadeer, iha área postu  polísia  Taibessi no Ajente Xefe Polísia  ho inisiál TX  halo agresaun tuku pesoál Saneamentu  nia ibun to’o ran tanba de’it la uza máskara.

Porta voz Komandu Jerál PNTL, Superintendente Xefe, Arnaldo de Araújo, hateten akontesimentu ne’e tanba  iha momentu ne’ebá ekipa  polísia halo hela patrullamentu ba iha área refere to’o iha ne’ebá hetan komunidade sira  balun tur iha karreta laran no vítima ne’ebé hetan agresaun la uza máskara.

Notísia Relevante : PDHJ arrola ona keixa oknum polísia basa pesoál Saneamentu

Relatóriu ne’ebé Komandu Jerál PNTL simu hosi Komandu Polísia Munisípiu Dili  katak, molok ne’e membru polísia sira hasé vítima to’o dala sia atu uza máskara no  la kumpre nune’e vítima tau máskara sees tiha hodi dehan polísia beik ten.

“Ho ida-ne’e mak hamosu hirus ka emosaun hosi membru polísia ne’e fó basa dala ida ba vítima depois mosu agresaun,” Superintendente Xefe, Arnaldo de Araújo haktuir ba jornalista sira iha Kuartél Jerál PNTL, Caicoli, Dili, sesta ne’e.

Mezmu ho razaun ne’e, maibé Komandu Jerál PNTL kontinua hein rezultadu investigasaun atu bele hetan nia verdade ho nia motivu problema.

Komandu PNTL Munisípiu Dili bolu no rona ona deklarasaun  vítima, sasin inklui membru PNTL ne’e hodi hatene kona-ba kronolojia. Tanba ne’e Komandu Jerál PNTL mós sei orienta investigasaun hodi bele hatene loos asaun sira-ne’e kontra lei ka lae.

Dadus ne’ebé iha, durante tempu serka sanitaria no konfinamentu iha Munisípiu ne’e, hatudu  membru Polísia na’in-rua ona maka envolve iha kazu “krime” agresaun fízika hasoru pesoál Saneamentu  Munisípiu Dili nian na’in-tolu.

Notísia Relevante : Investiga oknum PNTL ne’ebé baku pesoál saneamentu

Kazu primeiru iha Tasi-Tolu, ne’ebé video viral iha rede sosiál Facebook hatudu membru PNTL ida hosi Unidade Batallaun Orden Publika (BOP) basa pesoál Saneamentu ida no haruka pesoál Saneamentu na’in-rua ne’e basa malu.

Kazu tuir mak maka ida-ne’e, Ajente Xefe Polísia ho inisiál TX ne’ebé halo agresaun fízika hasoru pesoál Saneamentu ida iha Taibesi, Dili.

Ba kazu sira ne’e kategoria krime ofensa integridade fízika simples ne’ebé previstu iha artigu 145 Kódigu Penál ho moldura penál bele to’o tinan-tolu (3) ka multa.

Kontinua investiga kazu Tasi-Tolu

Biban ne’e, Komandu Jerál Polísia Nasionál Timor-Leste (PNTL) liuhosi orientasaun ba  Komandante Unidade Espesiál Polísia (UEP)  kontinua hala’o hela investigasaun ba membru polísia ida hosi Unidade Batallaun Orden Públika (BOP) ne’ebé baku ka basa pesoál saneamentu Munisípiu Dili, iha Tasi-Tolu, foin lalais ne’e.

“Prosesu andamentu investigasaun agora kontinua la’o hela bainhira remata sei relata mai iha komandu jerál mak sei deside,” Superintendente Xefe, Arnaldo de Araújo hateten.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here