Prezidente Parlamentu Nasional, Aniceto Guterres. Imajen Tatoli/Antonio Goncalves.

DILI, 19 marsu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, fó hanoin no husu ba Governu atu kontinua prevee pakote rekuperasaun ekonómika iha Orsamentu Jerál Estadu (OJE) 2022.

Prezidente Parlamentu Nasionál ne’e rekuñese medida serka sanitária ne’e fó impaktu ba atividade ekonómika no fó impkatu ba populasaun nia moris loro-loron nian.

Nia haktuir, iha 2020 bainhira hahú aplika Estadu Emerjénsia hodi fó subsídiu sira hanesan $200 no ikus iha tán cesta bázika, maibé programa uitoan de’it ba rekuperasaun ekonómika.

Nia dehan, VIII Governu Konstitusionál iha ona programa rekuperasaun ekonómika no implementa ona balun iha programa cesta bázika.

“Maibé ita espera reflete iha Orsamentu Jerál Estadu 2022 ninian,” Prezidente Parlamentu Nasionál, Deputadu Aniceto Longuinhos Guterres Lopes, informa ba jornalista sira, iha sala konferénsia iha uma fukun PN, sesta ne’e.

Nia fiar VIII Governu Konstitusionál sei trata no dezeña di’ak liu iha OJE 2022 tanba agora ba oin orsamentu kada programa hodi hahoris planu asaun anuál kada ministériu nian.

Nia subliña, planu atu di’ak liu tenke prevee iha Orsamentu Jerál Estadu tanba Governu iha kompromisu orsamentu bazea ba programa.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here