Pesoál seguransa Gardamor destakadu iha MNEK. Imajen/Espesiál

DILI, 19 marsu 2021 (TATOLI)—Ministériu Negósiu Estranjeiru no Kooperasaun (MNEK) klarifika, desizaun la estende kontratu kompañia Gardamor ba destakamentu pesoál seguransa iha ministériu, tanba bazeia ba avaliasaun interna ho nesesidade instituisaun.

Tuir nota ne’ebé Agência TATOLI asesu iha sesta ne’e hateten, prestasaun servisu MNEK iha barak, tanba ne’e presiza reve tamba bele utiliza rekursu ezistente iha institusaun ne’e ka instituisaun seluk Estadu ne’ebé iha.

“Hanesan parte ida hosi Estadu, MNEK iha obrigasaun atu kontribui ba jestaun di’ak hodi minimiza kustu supérfluos, tanba ne’e desizaun hirak ne’e foti bazeia ba avaliasaun interna no nesesidade instituisaun rasik,” refere nota imprensa.

Notísia relevante: Pesoál seguransa Gardamor eziji nafatin serbisu maski kontratu MNEK-kompañia ramata

Haktuir tan katak,  durante tinan hirak liubá, MNEK halo kontratu legál ho kompañia seguransa balun inklui kompañia Gardamor, la’ós ho pesoál seguransa-sira.

“Kontratu ne’e ho termu sertu ba tinan ida no estensaun bazeia ba prestasaun servisu liuhosi prosesu aprovisionamentu (konkursu), sujeitu ba nesesidade no avaliasaun interna instituisaun nian,” esplika nota hosi MNEK.

Aleinde ne’e, tuir komunikadu ne’e, iha tinan ne’e MNEK halo ajustamentu lubuk inklui prestasaun servisu seguransa hosi kompañia Gardamor la’ós ho indviduu sira, ne’ebé molok kontratu ramata, ministériu bolu no fó hatene situasaun atuál ba dirijente kompañia no momentu ne’ebá sira rasik komprende no aseita, inklui husu atu notifika iha loron 30 antesedénsia, nune’e bainhira atu termina kontratu, MNEK rasik kumpre pedidu ne’e.

Akordu kontratu prestasaun servisu seguransa ho kompañia Gardamor termina iha loron 31 dezembru 2020, maibé MNEK estende kontratu to’o fulan marsu nia klaran tinan ne’e, nune’e bele koordena ho Sekretaria Estadu Protesaun Sivíl (SETP) hodi koloka pesoál Seguransa Sivíl iha instituisaun ne’e, nune’e entrega fali serbisu ba Seguransa Sivíl.

Iha loron 11 marsu 2021, Vise-Ministru Negósiu Estranjeiru no Kooperasaun, Julião da Silva, dirije serimónia entrega servisu seguransa hosi kompañia Gardamor ba Seguransa Sivíl.

“Seremónia entrega ne’e la’o di’ak tebes tamba iha partisipasaun hosi parte-rua, kompañia Gardamor no Seguransa Sivíl. Hafoin serimónia termu entrega servisu ne’e, tuir lei, MNEK laiha ona relasaun kontratu, legál ka obrigasaun ruma ho kompañia Gardamor,” subliña nota.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here