Prezidente Parlamentu Nasionál, Deputadu Aniceto Longuinhos Guterres, hato'o mensajen kona-ba medida serka sanitária no konfiamentu obrigatóriu ne'ebé Estadu aplika, akompaña hosi Vise-Prezidente na'in-rua, Deputada Maria Angelina Lopes Sarmento no Deputadu Luis Roberto da Silva. Imajen/Relasaun públika PN.

DILI, 19 marsu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten medida serka sanitária no konfianamentu obrigatóriu ne’ebé Estadu aplika atu salva sidadaun sira hosi surtu COVID-19.

Nia haktuir, Estadu tomak preokupa ho espansaun COVID-19 no nia impaktu ba saúde públika, ba moris sosiál no ekonómika sidadaun sira no funsionamentu institutuisaun sira-ne’ebé halo servisu ba ema barak nia moris.

Estadu foti medida lubuk ida ona liuhosi Estadu Emerjénsia ne’ebé hanaruk ba dala-11 ona, fó subsídiu emerjénsia, hala’o programa rekoperasaun ekonómika, fahe cesta bázika ba sidadaun sira no agora aplika tán medida serka sanitária no konfinamentu obrigatóriu.

“Medida sira-ne’e hatudu Estadu nia preokupasaun no vontade atu salva sidadaun sira, mantein atividade bázika ba nesesidade sosiál no ekonómika bele funsiona nafatin no atu instituisaun públika no privadu sira funsiona nafatin tuir regra pandemia nian, hodi mantein saúde públika no privada labele piora liután,” Prezidente Parlamentu Nasionál hato’o mensajen ne’e iha uma fukun, sesta ne’e.

Governu deside aplika medida serka sanitária no konfinamentu obrigatóriu ba dala-rua to’o loron 2 fulan-abríl 2021 iha Munisípiu Dili, no to’o 29 marsu 2021 iha munisípiu Baucau no Viqueque.

Nia fó hanoin ba sidadaun hotu-hotu iha obrigasaun atu kumpre didi’ak medida hirak ne’e, no la taka dalan ba observasaun krítika objetiva ba aplikasaun medida sira Governu foti ne’e, no nakloke ba sujestaun ne’ebé kontribui ba hadi’ak medida ne’ebé iha no fó benefísiu ba ema hotu-hotu.

Hafoin tetu tiha faktu no fenómena lubuk ida, Governu deklara pontu situasaun epidemiolójika iha Timor-Leste ho medida lubuk ida.

Nune’e Prezidente Parlamentu Nasionál sita pontu balun hanesan taka movimentu ema sai no tama Munisípiu Dili, bele tolera de’it pasajen sira-ne’ebé ho razaun fundamentada ne’ebé relasiona ho seguransa públika, saúde públika, asisténsia umanitária, halo manutensaun ba sistema abastesimentu públiku ka interese públiku.

Nune’e mós ema ka sasán sira-ne’ebé hetan autorizasaun atu sai hosi ka tama ba Dili tenke liuhosi Sentru Kontrolu Integradu terrestre ne’ebé iha parte leste, sentru no oeste no fronteira aéreu no marítimu ne’ebé loke iha segunda, kuarta no sesta hosi tuku 06:00 dadeer to’o tuku 16:00 lokraik no transporte públiku sira iha Dili laran sei la sirkula.

Nu’udar Prezidente Parlamentu Nasionál no lori deputadu sira hotu nia naran reforsa pontu sira hanesan Parlamentu Nasionál nu’udar órgaun Reprezentante Povu nian kontinua nia atividade rútina hanesan plenáriu mínimu dala-ida semana ida, reuniaun komisaun, bankada no atividade administrativa la’o nafatin no tuir regra preventiva COVID-19 no medida serka sanitária nian.

“Parlamentu Nasionál liuhosi Deputadu sira fó atensaun no nakloke nafatin ba povu nia preokupasaun sira no atentu ba implementasaun medida sira-ne’ebé Governu foti, nia vantajen no desvantajen ba povu nian moris no observa mós Governu nia rekursu no kapasidade iha terrenu,” nia dehan.

“Ita rekoñese katak medida ne’ebé Estadu ka Governu foti hodi prevene no mitiga ka hamenus espansaun no impaktu hosi pandemia ne’e la’ós perfeitu. Ne’e duni presiza hotu-hotu nia kontribuisaun no kooperasaun hodi fó benefísiu ba ita hotu,” PPN fó hanoin.

Nia afirma, Estadu ka Governu laiha intensaun atu foti medida ne’ebé estraga fali povu ne’ebé nu’udar fonte hosi soberania no podér polítiku. Karik iha falla ruma iha implementasaun medida hirak ne’e, halo favór hato’o ba entidade kompetente.

Prezidente Parlamentu Nasionál husu ba sidadaun hotu atu kolabora ho autoridade sira, pesoál saúde no seguransa sira-ne’ebé servisu no halo sakrifísiu  maka’as iha terrenu.

“Karik iha membru komunidade, kolega servisu ruma ka viziñu ruma sofre ka infetadu, informa kedas ba autoridade saúde sira no labele hatudu atitude ka komportamentu diskriminativu hasoru sira, alerta no vijilante nafatin ba maneira ne’ebé halo trasmisaun virus, proteje-aan no proteje mós ema seluk,” nia dehan.

Prezidente Parlamentu Nasionál alerta no vijilante ba informasaun sira-ne’ebé laiha fundamentu ka falsa, boatu sira ka informasaun ne’ebé kria konfuzaun no instabilidade iha komunidade.

Prezidente PN ne’e agradese ba pesoál saúde, seguransa (PNTL no FFDTL) no seluk  ne’ebé halo servisu iha front line, ba Sentru Integradu Jestaun ba Krize (CIGC-sigla portugés) kona-ba dedikasaun no sakrifísiu no enkoraja nafatin kontinua vontade servisu.

“Husu atu respeita mós sidadaun sira-nia preokupasaun no krítika, no ba sidadaun sira atu respeita mós ita-nia maluk sira ne’ebé hala’o servisu hirak ne’e. Alerta, vijilante proteje-aan no proteje mós ema seluk,” PPN hato’o mensajen ba públiku durante vijénsia COVID-19 ne’e.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here