Pesoál saúde iha Departamentu hemodiálize, HNGV. Imajen Tatoli/Felicidade Ximenes.

DILI, 19 marsu 2021 (TATOLI)—Posibilidade Hospitál Nasionál Guido Valadares (HNGV), halo transferénsia ba pasiente hamutuk 95, hodi hala’o tratamentu iha Indonézia, tanba mákina atu fase ran limitadu.

“Pasiente-sira ne’ebé fase ran hamutuk 95 kedan, ita-nia mákina mós limitadu tanba durasaun fase ran ne’e ema ida kuaze oras tolu to’o haat. Entaun, pasiente hirak ne’e to’o semana ida mós labele halo hotu. Tanba ne’e ami haree hela oinsá transfere ba Indonézia,’’ Vise-Ministru Saúde, Bonifácio ‘Maucoli’ dos Reis hateten ba jornalista-sira, iha HNGV Bidau, sesta ne’e.

Notísia relevante:SS-CIGC rejista kazu pozitivu 23, rekoperadu haat, atuál baixa 138

Vise-Ministru ne’e esplika, Konsellu Diretivu HNGV no parte juntamédiku haree hela situasaun ida-ne’e, tanba haree mós ho problema COVID-19, no labele abandona no tenke salva pasiente-sira.

“Iha situasaun serka sanitária, ita haree hela opsaun liu hosi Ministériu Negósiu Estranjeiru no Kooperasaun, oinsá kontaktu ho Indonézia atu iha posibilidade bele simu ita nia pasiente-sira,’’ nia hateten.

Nia mós informa katak, pesoál saúde ne’ebé durante ne’e halo atendimentu ba pasiente fase ran iha HNGV, iha na’in-haat mak pozitivu COVID-19 no iha hela sala izolamentu, enkuantu sira seluk iha hela kuarentena ho rezultadu teste negativu, maibé tenke kompleta kuarentea to’o loron 14.

“Ezijénsia ida ne’e ita tenke lori pesoál saúde-sira fila-fali mai, tanba pasiente fase ran hein hela,’’ nia haktuir.

Maucoli hatutan, atu halo operasaun ba mákina fase ran, úniku espesialista na’in-neen ne’e mak tenke halo, nune’e Konsellu Diretivu HNGV  konvense ona sira  tenke hahú fila-fali atividade hanesan baibain uza ekipa protesaun individual, nune’e labele lori risku ba pasiente-sira.

Maucoli mós rekoñese katak, maski rekursu umanu sei limitadu, maibé parte Ministériu Saúde kontinua halo kapasitasaun ba pesoál saúde iha hemodiálize HNGV.

Iha fatin hanesan, Diretór Administrasaun Finansa no Lojístika HNGV, Duarte Marçal de Araújo, hateten bainhira detekta kazu pozitivu haat iha departamentu hemodiálize,  atividade fase ran  paradu durante loron-tolu no ohin Konselu Diretivu HNGV hahú hikas atendimentu ba pasiente-sira iha tuku 14:00.

“Ohin ita hahú fali fase ran no ita iha serbisu sift tuku 22:00, troka  fali to’o dader,’’ Duarte Marçal de Araújo hateten.

Nia dehan, maski pesoál saúde ne’ebé serbisu iha hemodiálize hamutuk 20-resin no na’in haat iha izolamentu, sira seluk iha kuarentena, maibé HNGV tenke husu fali sira nia prontidaun atu halo atendimentu, tanba pasiente-sira balun tenke fase dala-tolu kada semana.

“Ida-ne’e mak perigu. Tanba ne’e mak ami bolu fali sira atu halo atendimentu lalais. Ami koordena ho Ministra Saúde, Vise-Minsitru Saúde inklui pílar-sira  ne’ebé toma konta  ba kuarentena, tenke haruka fila pesoál saúde-sira atu halo atendimentu,’’ nia esplika.

Nia dehan, ohin de’it iha pasiente na’in 10-resin  mak atu fase ran, tanba ne’e pesoál saúde balun sei hela iha HNGV, balun hela iha otél  hodi apoia transporte bele lori sira ba mai, nune’e asegura atendimentu ba pasiente-sira.

Oras ne’e daudaun totál pasiente ativu fase ran iha HNGV hamutuk 95 ho mákina iha 11.

Ministériu Saúde liuhosi HNGV planeia ona atu sosa tan mákina rua iha tinan ne’e, no prosesu aprovizionamentu haruka ona ba Serbisu Autónomu Medikamentu no Ekipamentu Saúde (SAMES).

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here