Membru PNTL munisípiu Dili, hala'o hela sensibilizasaun kona-bá prevensaun COVID-19, ba negosiante iha área Aimutin, Dili (19/03/21). Imajen Tatoli/António Gonçalves.

DILI, 19 marsu 2021 (TATOLI)-Polísia Nasionál Timor-Leste (PNTL), sesta ne’e, detein juventude na’in-14 ne’ebé envolve iha konfrontu entre juventude  iha área eis Merkadu Comoro, Dili.

Iha tuku 09:00 dadeer, ohin, akontese grupu juventude rua hosi Aldeia 03  ho  Aldeia 05, Suku Fatuhada, Postu Administrativu Dom Aleixo, Munisípiu Dili, tuda malu rezulta  motór ida hetan estragu  no halo komunidade balun  iha eis Merkadu Comoro ta’uk no halai salva aan hosi fatuk.

Akontesimentu ne’e polísia mós rekolla evidénsia hanesan rama ambon tolu no piska ida. Segundu Komandante PNTL Munisípiu Dili, Superintendente Euclides Belo, hateten hafoin akontesimentu Komandu PNTL Munisípiu Dili  orienta kedas liña koordenasaun ho polísia rezerva no patrullamentu Dom Aleixo, Polísia Batallaun Orden Públiku (BOP) halo intervensaun no atuasaun hodi  hakalma situasaun.

Informasaun ne’ebé  autoridade polísia sira rona katak konfrontu ne’e hahú ho provoka malu dezde   kuarta (17/03/21) no komandu PNTL Munisípiu Dili ho apoiu hosi Unidade Espesiál Polísia (UEP) no ekipa Polísia Task Force Dom Aleixo halo uluk ona identifikasaun ba ema na’in-neen (6).

“Kinta kalan, polísia kontinua halo  prevensaun  maibé iha sesta dadeer ne’e, joven sira kontinua provoka hodi halo asaltu malu tanba ne’e ita konsege kaptura tan sira na’in-14,” Superintendente Euclides Belo informa ba jornalista iha Komandu PNTL Munisípiu Dili.

Suspeitu sira submete  hela ba identifikasaun iha  Eskuadra Polísia Dom Aleixo no submete ba investigasaun.

Polísia mós sei rekolla prova hosi parte vítima sira hodi  kanaliza faktu investigasaun.

Euclides Belo, apela ba joven sira  atu kontribui ba paz no dame  tanba daudaun iha implementasaun serka   sanitaria atu oinsá hotu-hotu hakmatek iha ida-idak nia fatin hodi halo prevensaun ba COVID-19.

Denilton  Fernandes nu’udar vítima haktuir, bainhira nia parte ba iha eis Merkadu Comoro atu hola temperus modo nian pois fila mai uma iha merkadu grupu ida ho joven barak ameasa  nia no na’in -da mak konsege tuku, maibé nia parte la koñese.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here