IOB Timor-Leste

DILI, 19 marsu 2021 (TATOLI)—Estudante Institute Of Business (IOB), na’in 726 mak hela iha kost.

Númeru estudante hirak ne’e, IOB identifika liu hosi prosesu levantamentu dadus durante semana ida, atu bele asesu ba apoiu umanitáriu hosi Governu durante serka sanitária iha Dili.

Notísia relevante:MESSK fahe formuláriu estudante hela iha kost ba universidade sira

Vise-reitór IOB ba asuntu akadémiku, António Soares Martins, hateten maski falta estudante ida mak seidauk hatama iha lista ne’e, maibé dadus ne’e submete ona ba Ministériu Ensinu Superiór Siénsia no Kultura (MESSK), iha sesta ne’e.

António Soares Martins, dehan estudante ne’ebé seidauk submete naran, hosi fakuldade turizmu departamentu jestaun ospitalidade, tanba durante ne’e la asesu ba informasaun.

“Ita orienta ona atu kompleta lalais ninia dadus liu hosi prienxe formuláriu hosi MESSK,” Vise-reitór ne’e hateten ba jornalista Agência Tatoli, iha kampus IOB Fomentu, sesta ne’e.

Kona-bá dadus estudante 726 ne’ebé submete ona ba MESSK, kompostu hosi estudante fakuldade tolu no departamentu sia.

Fakuldade ekonomia negósiu iha departamentu haat mak hanesan kontabilidade hamutuk estudante na’in 98, jestaun finanseíra na’in 70,  jestaun na’in 42 no siénsia ekonomia estudu dezenvolvimentu na’in 16.

Hosi fakuldade ICT kompostu hosi departamentu haat mak hanesan, jestaun informátika estudante na’in 181, téknika informátika na’in 262, kontablidade komputadór na’in 18 no téknika multi média na’in 29.

Fakuldade Ospitalidade turizmu, departamentu jestaun ospitalidade iha estudante na’in 10 mak hela iha kost.

Totál estudante 726 ne’ebé hela iha kost, mane na’in 397 no feto na’in 329.

Entretantu, MESSK hahú distribui formuláriu ba universidade no institutu superiór-sira iha 15 marsu, atu bele identifika estudante ne’ebé hela iha kost iha kapitál Dili, nune’e bele simu apoiu umanitáriu, hosi Ministériu Solidaridade Sosiál no Inkluzaun (MSSI).

Notísia relevante:Governu rekolla dadus molok apoia umanitária ba estudante iha kost

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here