Amostra hosi teste swab. Imajen Tatoli/Eugénio Pereira.

LIQUIÇA, 19 marsu 2021, (TATOLI) – Abitante sira Bairru Armola, Suku Maumeta, Postu Administrativu Bazartete, Munisípiu Liquiça, hakfodak no trauma rona informasaun hosi ibun ba ibun no publikasaun iha mídia balun hateten katak  kazál ida ho inisiál AC (mane) ho  VM (feto) iha Liquiça pozitivu COVID-19.

Komunidade parte ne’ebá fadigadu liután bainhira  rona informasaun ne’ebé fó sai hosi Pesoál Saúde  Munisípiu Liquiça, Marina Alves Ribeiro Soares, katak kazál ne’e pozitivu COVID-19 bazeia ba informasaun ne’ebé nia rasik simu hosi saúde nasionál.

Bainhira simu ona informasaun ne’e, kinta (18/03), ekipa saúde liña frente Liquiça kontaktu kedan jornalista hodi akompaña sira ba atu foti amostra ba kazál ne’e  nia família tanba antes ne’e halo hela kontaktu ba malu. Maske nune’e, la konsege foti  amostra liuhosi teste swab  tanba kalan ona, maibé ekipa saúde konsege halo kedan dezinfeta ba komunidade sira-nia uma .

Momentu ne’ebá Marina Alves Ribeiro Soares lia tun ba abitante sira katak kazál ne’e agora iha ona izolamentu Dili tanba pozitivu ona COVID -19.

“Ohin (horiseik-red) ami simu ona informasaun hosi nasionál katak ita-nia sidadaun rua iha Liquiça pozitivu ona, ne’e mak orienta ekipa atu foti amostra ba família sira ne’ebé sira kontaktu,”  Marina Alves Ribeiro Soares hateten.

Hosi informasaun ne’ebé fó sai ona hosi pesoál saúde  ne’e halo komunidade Liquiça barak pániku no trauma hodi hadook aan hosi família kazál ne’e nian atu prevene hetan da’et hosi peste letál ne’e.

Família sira hosi kazál rua ne’e mós halo kontaktu kedas ba kazál ne’e hodi buka hatene sira na’in-rua iha ne’ebé no oinsá ho sira-nia kondisaun saúde tanba dehan sira pozitivu COVID-19.

Hosi kontaktu ne’e, AC ho VM informa ba família sira katak sira iha hela sira-nia uma privadu ida iha Tasi-Tolu, la’ós kuarentena ka la’ós mós iha izolamentu. Mezmu konsege submete ba teste dala-rua mas rezultadu hatudu katak la iha sintoma COVID-19.

“Rezultadu dala-rua hatudu negativu no doutór haruka fila ba hela iha uma iha Tasi-Tolu,” AC no VM informa ba família sira hodi haktuir fali mai jornalista sira iha Liquiça, sesta ne’e.

Dadeer  ne’e ekipa saúde  ho jornalista sira to’o iha uma família AC no VM nian no ema barak hamriik hakilar to’o balun hasai liafuan la konfortavel hasoru ekipa saúde no duni fila ekipa saúde. Ho nune’e ekipa saúde la konsege halo teste swab ba família hirak ne’e no deside fila ba serbisu fatin.

Agência Tatoli halo konfirmasaun ba informasaun sira ne’e ho pesoál saúde  Marina Alves Ribeiro Soares, hodi verifika  loos informasaun  katak kazál ne’e pozitivu ka negativu.  Infelizmente, Marina Alves Ribeiro Soares, lakohi ona fó klarifikasaun no dehan de’it katak,  informasaun hotu hato’o ona ba Sala Situasaun Sentru Integradu Jestaun Krize (SS-CIGC) mak sei fó sai.

“Informasaun klaru orasida rona de’it iha SS-CIGC, ha’u labele ko’alia ona tanba horiseik sira nasionál mak fó orientasaun mai to’o ikus dehan fali laloos orasida mak sira klarifika iha Dili,” Marina Alves Ribeiro Soares hateten.

Agência Tatoli mós kontaktu liuhosi telefone ba AC ho VM ne’ebé agora iha sira-nia rezidénsia privadu ida iha Tasi-Tolu, Dili, hateten, sira na’in-rua kondisaun di’ak no iha hela uma.

“Ha’u agora ho ferik-oan iha hela uma  Tasi-Tolu, Dili. Informasaun dehan ami na’in-rua pozitivu ona ba COVID-19 ne’e laloos,”  AC hateten.

Nia haktuir katak kinta horiseik,  sira na’in-rua ba duni halo konsulta iha Hospital Nasionál Guido Valadares  (HNGV) no rezultadu teste hatudu negativu no horibainrua mós teste hotu no nia rezultadu mós negativu.

“Teste dala-rua negativu hotu ne’e maka doutór sira iha HNGV haruka ami fila ona mai uma,”  AC afirma tan.

VM  nu’udar AC nia espoza  afirma mós katak nia ho nia katuas-oan ba halo konsulta ka tratamentu hemodialyzed (fase-ran) iha HNVG no VM rasik uza hela katetér iha kelen.

“Ami ba konsulta iha HNGV tanba ha’u tenke fase-ran, tanba ha’u uza katetér iha kelen, entaun buat ne’e liu ona loron ha’u kona moras bee-doko (isin-malirin), entaun doutór sira haree hakfodak ho bee-doko ne’e telefone fali ba doutór sira koko kona ba COVID-19 ne’e hodi mai koko fila fali ha’u mais negativu, bainhira ema kuandu uza katetér iha kelen ona ne’e moras bee-doko sempre kona bainhira tau ona iha liman entaun foin laiha,” VM haktuir.

Nia fó sasin katak  iha loron hanesan iha duni doutora ida iha HNGV mak hetan pozitivu COVID-19 no Sentru Integradu Jestaun Krize (CIGC) ba tula kedan hodi lori ba fatin izolamentu.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here