Banku Dezenvolvimentu Aziátiku (ADB) ho Fundu Nasaun Unida ba Infánsia (UNICEF), oferese fasilidade saúde atu bele uza iha Ospitál Lahane, Tersa (02/03/21). Imajen Tatoli/António Gonalves.

DILI, 19 marsu 2021 (TATOLI)—Governu liu hosi  Ministériu Saúde (MS) no Sala Situasaun Centro Integrado Gestão de Crise (SS-CIGC), hamutuk ho Ministériu relevante-sira, preparadu atu halo atendimentu ba pasiente COVID-19, bainhira Timor-Leste (TL) tama iha senáriu aat-liu.

Koordenadór Forsa-Tarefa ba Prevensaun no Mitigasaun, Rui Maria de Araújo fó-sai asuntu ne’e, liu hosi konferénsia imprensa iha Centro Convenções Dili (CCD), sesta ne’e.

Notísia relevante:SS-CIGC rejista kazu pozitivu 23, rekoperadu haat, atuál baixa 138

“Governu halo ona preparative, liuliu fatin ba senáriu ne’ebé mak pior-liu. Maibé, ha’u hakarak konvida nafatin ita hotu atu ho seriedade no kalma, tanba númeru kazu ne’e aumenta iha Dili,’’ nia hateten.

Númeru pozitivu ne’ebé aumenta iha Munisípiu-sira, nia konsidera ida ne’e mai hosi ema-sira ne’ebé sai hosi Dili, no parte SS-CIGC kontinua buka tuir kontaktu-sira.

“Ohin ita deteta kazu 23 no tuir-mai ita sei kontinua deteta nafatin, tanba foku ba transmisaun ne’e sei iha. Entaun, ida ne’e la signifika ita la presiza prepara ba senáriu ne’ebé aat-liu,’’ nia esplika.

Kona-bá mekanizmu preparativu ne’e, nia dehan, Governu haree liu fatin izolamentu ba kazu sira ne’ebé asintomátiku,  kazu lizeiru ka sintomátiku ne’e ladún todan, ba kazu moderadu ho kazu grave mós prosesu preparativu la’o hela.

Médiku ne’e temi ekipa serbisu preparativu mak hanesan, ekipa SS-CIGC liu-liu destakamentu reasaun rápida, serbisu intensivamente ho pilár relevante-sira iha Ministériu Saúde, inklui estrutura Minsitériu-sira seluk  hanesan ADN, Ministériu Obra Publika (MOP), atu prepara  infraestrutura, nune’e bele responde dezafiu iha senáriu pior-liu iha tempu tuir-mai.

Antes ne’e Vise-Ministru Saúde, Bonifácio ‘Mau-Coli’ dos Reis, hateten Ministériu Saúde prepara ona kondisaun liuliu fatin Intensive Care Unit (ICU), iha antigu Ospitál doutór António de Carvalho, Lahane, atu responde situasaun surtu COVID-19, bainhira Timor-Leste tama iha senáriu aat-liu.

MS prepara Ospitál doutór António de Carvalho Lahane sai hanesan fatin ICU ba kazu lizeiru, fatin iha tasi-tolu sai hanesan Izolamentu ba kazu moderadu-sira ho orsamentu ba konstrusaun rihun $400-resin.

Kona-bá rekursu umanu, parte Ministériu Saúde halo ona rekrutamentu ba pesoál limpeza, médiku, enfermeiru no parteira ba Ospitál Lahane inklui Tasi-tolu.

Tuir planu, MS sei halo-tan rekrutamentu ba profisionál-sira ne’ebé sei halo atendimentu iha ICU.

Notísia relevante:Bainhira senáriu aat-liu, Governu sei uza Ospitál Lahane

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here