Diretor CIGC, Brigadeiru-Jenerál, João Miranda 'Aluk Descartes' . Imajen TATOLI/Egas Cristovão

DILI, 19 marsu 2021 (TATOLI)—Sala Situasaun, Sentru Integradu Jestaun Krize (CIGC, sigla portugés) rekoñese sistema saúde Timor-Leste mínimu tebes kompara ho país seluk iha mundu, tanba ne’e husu atu halo tuir medida prevensaun COVID-19 atu nune’e labele lori risku todan ba país no presiza mós populasaun nia konsiénsia.

“Timor-Leste hanesan país ho kondisaun no fasilidade saúde mínimu liu, tanba ne’e husu populasaun iha konsiénsia no labele rona rumoris sira laloos. Fatin kuarentena mós laiha ona espasu atu akomoda ema, tanba ne’e tenke iha konsiénsia no fó importánsia ba medida prevensaun vírus tanba moras ne’e la’ós halimar, realidade ita-nia nasaun viziñu Indonézia númeru afetadu sa’e hela de’it,” Diretór Sala Situasaun CIGC, Brigadeiru-Jenerál João Miranda ‘Aluk Descartes’, hateten ramata enkontru ho Primeiru-Ministru, Taur Matan Ruak, iha Palásiu Governu, sesta ne’e.

 Iha sorin seluk, nia konsidera populasaun menus informasaun no la fiar COVID-19 eziste iha Timor-Leste, maibé husu nafatin atu iha konsiénsia kumpre medida hosi Ministériu Saúde (MS) no Organizasaun Saúde Mundiál (OMS).

“Situasaun ne’e realmente akontese, balun hateten katak Governu politiza, maibé Sala Situasaun nia haree populasaun seidauk bele simu ho kondisaun reál. Tanba ne’e maka dala barak ami ko’alia ho Ministériu Saúde katak iha nesesidade halo sosializasaun liuhosi meiu hotu atu oinsá komunidade bele iha konsiénsia katak COVID-19 ne’e eziste duni iha Timór,” nia akresenta.

Tuir Diretór CIGC, daudaun ne’e Timor-Leste tama ona iha kategoria transmisaun lokál, seidauk tama iha kategoria transmisaun komunitária.

“Espera ita labele tama iha situasaun transmisaun komunitária, tanba kuandu tama ona maka sei hasoru problema boot,” nia hatutan.

To’o oras ne’e, Timor-Leste rejista ona kazu konfirmadu COVID-19 hamutuk 229 desde anunsiu dahuluk iha marsu 2020, ne’ebé rekupera ona 114, no kazu ativu ne’ebé baixa hela iha sala izolamentu hamutuk 119.

Entre kazu hirak ne’e, 187 hosi Dili, 19 hosi Covalima, Baucau hitu, Bobonaro neen, Oé-cusse lima, Viqueque tolu no Liquiçá rua.

Kazu ativu hamutuk 95 ne’ebé detetadu iha Dili, to’o agora fahe ona ba cluster 27, ne’ebé namkari iha instituisaun haat, eventu ida, suku ualu, no fatin kuarentena ida.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here