Ekipa taskforce BTL,E.P enxe bee iha tanke ne’ebé instala iha Merkadu Taibesi. Imajen/BTL,E.P

DILI, 18 marsu 2021 (TATOLI)-Governu liuhosi Bee Timor-Leste, Empreza Públika (BTL,E.P) hahú hosi Estadu Emerjénsia dahuluk to’o agora (antes ne’e hanesan Diresaun Jerál Água no Saneamentu) monta ona tanke bee fase liman hamutuk 189 iha territóriu tomak ba abitante sira.

“Ami kontinua esforsu halo serbisu ho parseiru dezenvolvimentu sira hodi instala tanke fase liman iha fatin públiku iha terrítoriu Timor-Leste hamutuk 189, ne’ebé hetan pedidu hosi entidade sira,” Prezidente Konsellu Administrasaun BTL.E.P, Carlos Peloi dos Reis, informa ba Agência TATOLI, iha ninia knaar fatin, Caicoli, Dili, sesta ne’e.

Empreza estatál ne’e hetan apoia hosi ajénsia internasionál sira, parseiru bilaterál no Organizasaun Naun Govermentál (ONG) nasionál no internasionál, hahú hosi tinan kotuk to’o agora hodi monta ona tanke fase liman iha munisípiu Aileu hamutuk hitu, Ainaro haat, Baucau  neen, Bobonaro 19, Covalima 38, Dili 43, Ermera haat.

Nune’e mós, munisípiu Lautém 12, Liquiçá lima, Manatuto neen, Manufahi 10, Rejiaun Administrativu Espesiál Oé-cusse (RAEOA) 15 no Viqueque 20.

Iha inísiu marsu 2021, relasiona ho períodu serka sanitária no konfinamentu obrigatóriu iha Dili no munisípiu Baucau no Viqueque, ekipa task force BTL,EP instala tan tanke fase liman haat  iha baliza entrada kapitál Dili hanesan Maliana-Liquiçá-Ermera-Dili, monta iha postu seguransa Tasi-tolu, (Suai, Same, Ainaro, Aileu-Dili) iha postu seguransa Bee Tudak Sarlala no (Lospalos Viqueque, Baucau, Manatutu-Dili) no iha postu seguransa Metinaro no Marabia.

Koopera ho parseiru monta fasilidade sanitária

Fasilidade sanitária hirak ne’e, BTL,EP koopera hamutuk ho United Nations International Children’s Emergency Fund (UNICEF) no Cruz Vermelha de Timor-Leste (CVTL) hodi hala’o ona konstrusaun no rehabilitasaun ba toilet públiku iha Fronteira Mota-ain, Mota-Masin, Merkadu Liquiçá, Merkadu Gleno, suku Manleu-Manatuto, Beheda, reabilitasaun toilet iha Merkadu Taibesi, Largo Lecidere, Ponte BJ Habibi nia sorin, no Cristo Rei.

“Ami nafatin hala’o kooperasaun ho UNICEF no Asian Development Bank (ADB), ne’ebé sei Instala  Scholl Water Tower (SWT) ho kuantidade 91, no  Hand Washing Station (HWS) ho kuantidade 33 iha munisípiu Dili, Ermera, Manatuto, no Liquiçá ne’ebé daudaun iha faze preparasaun hamutuk ho Ministériu Edukasaun Juventude no Desportu (MEJD) no UNICEF,” nia akresenta.

Nune’e mós, BTL,EP kontinua halo kooperasaun ho Department of Foreign Affairs and Trade (DFAT)-Partnership for Strengthening Village Development and Municipal Administration (PARTISIPA) hodi prepara fasilidade tanke  no  fasilidade fase liman hodi antisipa númerú kazu ativu COVID-19 aumenta barak liután iha tempu oin mai, ne’ebé sei iha apoiu tanke ho fasilidade fase liman hamutuk unidade 20 inklui ekipamentu protesaun pesoál.

“Ita inklui ona bee no sabaun, maibé infelizmente, utilizadór ka oknum balun foti hotu sabaun no fai kuak tanke no silu tohar torneira, maibé ida-ne’e filafali ba konsénsia ema ida-idak ninian. BTL.EP nafatin troka no hadi’a fasilidade ne’ebé maka ema balun estraga,” nia afirma.

Ekipa taskforce kontinua halo monitorisaun inklui ekipa hosi rede sosiadade sivíl ne’ebé hamaha-an iha WASH forum ‘BESI TL’, kontinua fó kontribuisaun hodi informa ba BTL,EP kona-ba kondisaun tanke no fasilidade sira inklui bee.

“Karik mamuk ou menus, ekipa taskforce kontinua enxe bee ba tanke sira iha Dili no iha munisípiu sira, hamutuk ho ekipa forsa tarefa COVID-19 nível munisipál,” nia katak.

BTL husu komunidade kuida fasilidade sanitária

BTL,EP  iha pájina Facebook ne’ebé sempre públika aktividade sira, karik iha informasaun ruma hosi utilizador sira, bele hato’o informasaun liuhosi pájina, nune’e ekipa taskforce bele fó atendimentu.

“Ita hotu nia esperansa maka utilizadór iha fatin públiku sira kontribui kuida fasilidade sanitária tanba nu’udar rekezitu protokolu hosi Organizasaun Munidiál Saúde (OMS) hodi prevene COVID-19,” Prezidente KA BTL hatutan.

Nia dehan, hosi inisíu tinan 2020, desde COVID-19 eziste iha Timor-Leste, momentu BTL hanesan Diresaun Nasionál Água no Saneamentu (DGAS, sigla portugés) iha Ministériu Obra Públika (MOP), laiha orsamentu própiu ba asaun prevensaun.

“Asaun ne’e nu’udar knaar umanitária hosi BTL.E.P ne’ebé serbisu hamutuk ho parseiru WASH sira no  ami sei kontinua serbisu ho parseiru sira hodi presta serbisu umanitáriu ba ita-nia povu doben,” nia kompromete.

Tanba ne’e, BTLPrezidente empreza estatál ne’e husu kontibuisaun públiku atu kuidadu fasilidade sira nu’udar asaun valoriza serbisu ne’ebé maka ekipa taskforce ho parseiru dezenvolvimentu, sosiadade sivíl nasionál no internasionál sira hala’o ona.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here