Deputada CNRT, Carmelita Caetano Moniz. Imajen/Egas Cristovão.

DILI, 19 marsu 2021 (TATOLI)—Bankada Congresso Nacionál de Reconstrução de Timorense (CNRT) husu Ministériu Públiku atu anula notifikasaun ba deputadu hamutuk 21 tanba latuir Kódigu Prosesu Penál (CPC-sigla portugés).

Notísia Relevante: Deputadu Bankada CNRT 21 atu presta deklarasaun depende ba pedidu MP

Deputada Carmelita Moniz Caetano haktuir, kada deputadu hosi na’in-21 ne’e simu ona notifikasaun hosi Ministériu Públiku iha loron 15 fulan-marsu tinan 2021.

Ministériu Públiku (MP) notifika deputadu CNRT 21 kona-ba deklarasaun ka opiniaun polítika nu’udar deputadu ne’ebé hasai iha Parlamentu Nasionál. Opiniaun polítika hosi Bankada CNRT ne’e mak halo Eis Primeiru-Ministru no atuál Sekretáriu Jerál Partidu Frente Revolusionária Timor-Leste Independente (FRETILIN), Mari Alkatiri keixa ba Ministériu Públiku.

Nia dehan, ohin bankada CNRT fó ona resposta liuhosi karta eskrita ida ba Ministériu Públiku liuhosi prokuradór titulár ne’ebé kaer kazu ne’e no fó mós kuñesimentu ba Prokuradór Jerál Repúbliku, José da Costa Ximenes.

“Ami husu nulidade notifikasaun (notifikasi tidak sah) ne’e, tanba notifikasaun ne’ebé hato’o mai ami ne’e, la tuir kritériu ne’ebé hatuur iha ita-nia Kódigu Prosesu Penál. Ami husu sira (MP) anula tanba la prenxe kódigu prosesu penál nia haruka,” Deputada Carmelita Caetano Moniz informa ba jornalista sira, iha Parlamentu Nasionál, sesta ne’e.

Nia esplika, notifikasaun ida tenke entrega ba na’in rasik no hetan asinatura hosi ema ne’ebé simu notifikasaun tanba notifikasaun ne’e mensiona nune’e.

Nia fó-sai katak, iha notifikasaun ne’e mós konsidera deputadu 21 nu’udar sidadaun bainbain no la tau deputadu 21 ne’e nia pozisaun nu’udar deputadu ka deputada.

“Se fó ha’u entaun tenke buka ha’u para entrega ba ha’u mak tenke simu. La’ós hanesan sira-nia maneira ne’ebé haruka, lori notifikasaun ne’e ba bankada CNRT, fó ajenda naruk ida depois ami-nia funsionáriu ida de’it mak asina ajenda ne’e. No, sira lori fila ona, ne’e la prenxe rekizitu legál,”  Eis Prezidente Komisaun A ne’e fundamenta.

Nia akresenta, tuir prosedimentu legál dentru loron lima (5) hafoin simu notifikasaun tente halo mós kontestasaun ba notifikasaun ne’e.

“Katak ita haree tuir lei ka la tuir lei. Se la tuir lei, ita iha tempu atu husu Ministériu Públiku atu anula notifikasaun, ne’ebé oras ne’e iha faze inkéritu,” nia dehan. 

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here