Edifisíu MNEK. Imajen/Espesiál

DILI, 18 marsu 2021 (TATOLI)–Ministériu Negósiu Estranjeiru no Kooperasaun (MNEK) kontinua kolabora ho Ministériu Finansa (MF) atu fasilita transferénsia orsamentu ba misaun diplomátika Timor-Leste iha rai-liur.

“Apela ba misaun sira ne’ebé seidauk kumpre, atu observa regra ezekusaun orsamentu sira, haruka relatóriu ho tempu, gasta osan ho loloos, tuir item ne’ebé aprovadu, uza meiu ne’ebé ministériu fó, hanesan share folder, email ka sira seluk atu haruka relatóriu ne’ebé MNEK husu,” refere nota ne’ebé Agência TATOLI asesu, kinta ne’e.

Esplika mós katak, ministériu halo ona esforsu hotu maibé buat barak la depende de’it mai MNEK tanba iha interdependénsia institusionál responsabilidade, dever no obrigasaun hosi parte hotu ne’ebé envolve iha prosesu ne’e tantu iha kapitál no misaun diplomátika sira iha rai-li’ur.

“Sede MNEK hatene no rekoñese iha atrazu transferénsia sira ne’ebé implika prestasaun servisu iha rai-li’ur, maibé presiza rekoñese mós sirkunstánsia sira seluk, la’ós tékniku administrativu de’it, maibé seluk ne’ebé sai hosi kontrolu servisu tékniku-sira,” nota ne’e esklarese.

Notísia relevante: MNEK submete pedidu pagamentu 27 renda-kustu operasionál reprezentante iha rai-li’ur

Maski nune’e, MNEK nafatin espresa vontade atu serbisu hamutuk ho parte relevante hotu, iha kapitál Dili no rai-li’ur atubele fasilita la’ós de’it transferénsia, maibé mós prosesu ezekusaun no rekonsiliasaun sistema free balance atu la impede transferénsia sira tuirmai, tanba sistema servisu  interligadu sempre iha implikasaun administrativu.

“Husu ba misaun diplomátiku sira, karik iha difikuldade bele halo konsulta ho MNEK no labele rai osan liu 10% hosi dotasaun orsamentu misaun nia atu evita out standing hodi fó implikasaun ba transferénsia sira iha tempu oin,” subliña nota ministériu e’e.

Husu mós atu misaun diplomátika konsidera sirkulár sira ne’ebé ministériu haruka kona-ba asuntu orsamentu no ezekusaun sira.

Biban ne’e, MNEK mós informa katak Commitment Payment Voucher (CPV) sira haruka hotu ona ba MF no rejistadu iha sistema Free Balance desde 12 marsu, maibé balun mak seidauk bele haruka ba finansa sentrál tanba sei iha kestaun tékniku ne’ebé presiza kompleta.

“MNEK kontinua koopera ho finansa sentrál atu solusiona asuntu ne’e iha tempu badak,” katak.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here