Estudante hosi Eskola Sekundáriu Santo António Baucau. Imajen Espesiál.

DILI, 18 marsu 2021 (TATOLI)—Serbisu Edukasaun Munisípiu Baucau (SEMB), rejista ona eskola hamutuk 228, hahú hosi Edukasaun Pré-Eskolár (EPE) to’o Ensinu Sekundáriu Jerál (ESJ) no Tékniku Vokasionál (TEKVOK).

Diretór SEMB, Felix Ximenes ba jornalista Agência Tatoli via telefónika kinta ne’e, hateten eskola hirak-ne’e rejistadu liu hosi prosesu levantamentu dadus iha tinan 2021.

Notísia relevante:Kualidade Edukasaun, Baucau Sempre Tama Iha Mellor Kualifikasaun

“Dadus 2020 ita rejista eskola 219, maibé iha 2021 ita halo fali levantamentu, konsege rejista-tan Edukasaun Pré-Eskolár sia. Nune’e, númeru aumenta ba 228,” nia hateten.

Felix Ximenes hatutan, eskola 228 ne’ebé rejistadu iha 2021 kompostu hosi Edukasaun Pré Eskolár 30, Ensinu Báziku 184 (sentrál 25 no filiál 159), Ensinu Sekundáriu sia (jerál ualu, TEKVOK ida).

Maski 2021 rejista ona eskola 228, maibé nia dehan, dadus estudante sei bazeia ba tinan 2020 ho totál 41.404, tanba EBC Osahuna Baguia mak seidauk haruka dadus foun estudante mai SEMB.

Diretór ne’e iha esperansa katak, bainhira situasaun normál ona, parte EBC Osahuna Baguia sei submete dadus, atu bele hatama iha baze de dadus munisipál-nian, nune’e bele haruka ba Ministériu Edukasaun Joventude no Desportu (MEJD).

Nia mós apela ba profesór no estudante-sira atu kumpre regulamentu serka sanitária no tenke pratika moris saudável, nune’e evita transmisaun COVID-19 iha Timor-Leste, espesialmente iha Munisípiu Baucau.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here