Enkontru SEKOMS, Diretór MS no parte relevante iha Palásiu Governu, tersa (18/03). Imajen/SEKOMS

DILI, 18 marsu 2021 (TATOLI)–Sekretaria Estadu Komunikasaun Sosiál (SEKOMS) sei kolabora hamutuk ho Ministeriu Saúde (MS) no Sentru Integradu Jestaun Krize (CIGC, sigla portugés) atu kombate lia bosok ‘hoax’ iha ámbitu COVID-19.

Tanba ne’e, Sekretáriu Estadu ba Komunikasaun Sosiál, Merício Juvinal dos Reis ‘Akara’ konvoka enkontru ho parte relevante hodi ko’alia kona-ba maximiza partisipasaun mídia hodi kombate hoax iha situasaun emerjénsia, nune’e bele divulga informasaun sira ho efetivu no efikáz ba públiku.

“SEKOMS prontu kolabora, tanba ida ne’e hanesan ita-nia dever tenki divulga informasaun ne’ebé kredível ba sidadaun hotu, liuliu kona-ba COVID-19” Sekretáriu Estadu Akara, liuhosi nota komunikadu ne’ebé Agência TATOLI asesu kinta ne’e.

Governante ne’e konsidera, koordenasaun serbisu importante tanba tenke fó informasaun loloos ba sidadaun.

“Husu sidadaun sira atu fó konfiansa nafatin ba Estadu no Governu hodi kontrola situasaun iha territóriu,” nia akresenta.

Iha fatin hanesan, Diretór MS, Carlito Freitas, dehan, hosi parte ministériu liuhosi pilár 2 ne’ebé responsável ba área komunikasaun risku envolvimentu komunidade, durante ne’e iha difikuldade ba divulgasaun informasaun liga ho COVID-19 no informasaun hoax.

“Ami labele hala’o serbisu mesak, tanba ne’e husu apoiu SEKOMS atu mobiliza mídia sira seluk bele apoiu hakma’an serbisu ne’e, hodi divulga informasaun liga ba COVID-19 inklui hoax ne’ebé espalla iha komunidade nia le’et,” nia akresenta.

Sorumutuk ne’e akompaña hosi Prezidente Rádiu Televizaun Timor-Leste, Empreza Públika (RTTL,EP), Francisco da Silva Gari, Prezidente Agência TATOLI,IP, Manuel Pinto, Diretór Nasionál Promosaun Dezenvolvimentu Mídia Lokál, Paulino Quintas, inklui ekipa tékniku hosi Gabinete Primeiru-Ministru no SEKOMS.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here