Ministra Saúde, Odete Maria Freitas Belo ho Embaixadór Cuba, Omar Marrero Betancourt hala’o enkontru iha Sala Gabinete Ministra, Palásiu Sinzas, Caicoli, Dili. Imajen/Média MS.

DILI, 18 marsu 2021 (TATOLI)—Ministra Saúde (MS), Odete Maria Freitas Belo ho Embaixadór Cuba, Omar Marrero Betancourt, diskute estabelesimentu formasaun médiku espesialista Timoroan iha Timor-Leste (TL).

“Ita ko’alia kona-bá, depois de ita serbisu hamutuk tinan barak-nia laran, ba formasaun médiku jerál. Agora daudaun ita hahú ona atu forma fali médiku espesialista-sira ne’ebé ohin mós ko’alia, iha posibilidade atu bele halo formasaun iha UNTL,” Odete Maria Freitas Belo hateten iha Palásiu Sinzas, Caicoli, Dili, kinta ne’e.

Notísia relevante:Cuba Sei Hametin Relasaun Polítika Altu Nível ho TL

Ministra Saúde agradese tebes ho inisiativa ida-ne’e, no husu disponibilidade Embaixadór Cuba atu prepara dokumentu ida, nune’e bele haree hamutuk, kona-bá mekanizmu atu inisia, liuliu bele haree mós ho kondisaun saida mak bele prepara iha UNTL, molok implementasaun ka hahú formasaun  espesialidade.

“Ita hakarak hahú espesialidade saida mak uluk, depende ba moras ne’ebé mak iha ita-nia rain hanesan moras ne’ebé mak aas-liu, dalaruma ita hahú uluk ho espesialidade ida-ne’e,’’ nia subliña.

Entretantu, kooperasaun Timor-Leste ho Governu Cuba realiza iha Governu dahuluk, lihosi kompromisu entre Prezidente Cuba, Fidel Castro ho Prezidente Timor-Leste, Kay Rala Xanana Gusmão, iha enkontru ne’ebé hala’o iha Kuala Lumpur, Malázia, tinan 2003.

Hosi kooperasaun ne’e, Brigada médika Cubana konsege forma ona médiku Timoroan 1.000-resin  ne’ebé oras ne’e fó asisténsia sáude iha territóriu TL.

Notísia relevante:Médiku Timoroan 29 Kontinua Estuda Espesialista iha Cuba, Na’in 1 Fila

Jornlista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here