Ministru Obra Públika, Salvador Eugênio Soares dos Reis Pires. Imajen TATOLI/Egas Cristóvão

DILI, 18 marsu 2021 (TATOLI)—Governu iha ona planu atu fó resposta lalais ba efeitu COVID-19 iha Timor-Leste, ba populasaun tomak liuhosi apoia uminitária, ekonómika no sosiál ba populasaun.

Ba kestaun ne’e, tuir Ministru Obra Públika, Salvador Eugênio Soares dos Reis Pires, Ministériu Finansa (MF) mak sei dezeña polítika no estratéjia Governu.

“Ministériu Finansa mak dezeña programa intervesaun Governu tomak, enkuantu Ministériu Obra Públika (MOP) no ministériu seluk hein aprezentasaun iha Konsellu Ministru, hafoin submete planu ruma hodi halo diskusaun no deliberasaun,” Ministru Salvador informa ba Agência TATOLI, via telefónika, kinta ne’e.

Notísia relevante: Governu komprometidu apoia umanitária, ekonómika no sosiál ba populasaun

 Liña ministeriál ne’ebé sei envolve halo planu sosiu-ekonómiku mak hanesan MOP, Ministériu Saúde (MS), Ministériu Defeza (MD) no Minisériu Interiór (MI), Ministériu  Koordenadór Asuntu Ekonómiku (MKAE), Ministériu Edukasaun, Juventude no Desportu (MEJD), Ministériu Ensinu Superiór, Siénsia no Kultura (MESSK) ho akompañamentu hosi MF.

Kona-ba planu ne’ebé sei kontribui iha polítika ne’e, MOP sei haree modelu programa saida de’it mak presiza, karik apoiu subsídiu pre-pagu ba uma-kain hanesan tinan kotuk ka bele seluk.

Maski nune’e, iha ámbitu evolusaun COVID-19 iha Timor-Leste, MOP liuhosi Bee Timor-Leste, Empreza-Públiku (BTL.E.P) halo ona intervensaun hanesan prepara fasilidade sanitária hanesan monta tanki bee moos iha fatin públiku hanesan merkadu, nune’e abitante sira bele fase liman.

“Bee Timor-Leste kontinua la’o hamutuk ho parseiru sira atu komunidade sira bele fase liman hodi prevene-an hosi COVID-19,” nia akresenta.

Iha tinan kotuk, MOP fó subsídiu pre-pagu eletrisidade ho montante $15 ba kada kliente ho totál kliente hamutuk 160.555 iha territóriu laran, nune’e la presiza ba sosa pulsa atu kumpre nafatin distánsia sosiál ne’ebé hatuur iha regra Estadu Emerjénsia.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here