Kondisaun eskola Sekundária Jerál Kilik-Waigae, Suku Caibada Makasae, Postu Administrativu Baucau Vila, Munisípiu Baucau. Imajen/Puto Naldo Rei.

DILI, 18 marsu 2021 (TATOLI)—Ministériu Edukasaun Joventude no Desportu (MEJD), sei halo konstrusaun no reabilitasaun ba edifísiu eskola hamutuk 26, iha Munisípiu Baucau.

Diretór Serbisu Edukasaun Munisípiu Baucau (SEMB), Felix Ximenes, hateten eskola 26 ne’e tama iha númeru eskola 222 ne’ebé MEJD planeia atu konstrui no reabilita iha tinan ne’e.

Notísia relevante:PN aprova osan ba MEJD ho montante millaun $111-resin

“Dadus ne’ebé ami submete ba MEJD hamutuk eskola 30, maibé eskola 26 de’it mak hetan ona aprovasaun,” Felix Ximenes, hateten ba jornalista Agência Tatoli via telefónika, kinta ne’e.

Kona-bá orsamentu, diretór ne’e la hatene, maibé informasaun ne’ebé nia rasik rona hosi parte MEJD katak, orsamentu ba eskola 26 ne’e, prevee ona iha Diresaun Fundu Infraestrutura MEJD-nian.

Nia rekoñese katak, edifísiu eskola hirak ne’e presija duni atu halo konstrusaun foun ka halo duni reabilitasaun, tanba kondisaun grave no sira-nia konstrusaun desde tempu okupasaun Indonézia, no oras ne’e hetan estragus totál.

“Kalén-sira kuak hotu ona, parede mós monu hotu ona, inklui sinta mós tabele hela no ai sira lahuk hotu. Kondisaun ne’e difikulta estudante-sira durante ensinu aprendizazen tanba udan-been tama iha tempu udan,” nia esplika.

Tuir dadus ne’ebé SEMB iha, eskola sira ne’ebé hein verifikasaun finál ba dokumentu-sira hosi Ministériu Obra Públika (MOP) mak hanesan, ESJ filiál Baquia, EBC Ossohuna, EBC 1,2,3 Buawa Lavateri, EBF Ossu Ufulari, EBF Uacala, Pré-Eskolár Sentru Baguia, Pre-Eskolár Lari-Sula, EBF Gulari, ESJ 01 Baucau, EBF 1,2 Maukale, EBF Gólgota, ESJ 02 Vila Nova, ETV Baucau, EBF Bucoli, EBF Fitun Sagadate, EBF Cat Lalabuu, EBF Ossolia, EBF Daralaa, EBF Uadaboru, EBF Uaiaca, EBF Gamana, EBF Abo Lir, EBC Letemumu, ESJ Filiál Afaca, EBF Cat Darenafa, EBC Uaibua, Pré-Eskolár Amizade.

Iha mós eskola haat seluk ne’ebé la hetan aprovasaun mak hanesan ESJ Filiál Kilik Uegae, EBF siklu 1,2 Kaibada Makasa’e, EBC síkulu 1,2,3 Daranafa Quelicai no EBC Ossoaque.

Parte MEJD mós sei esforsu atu bele buka apoiu hosi parseiru-sira hodi bele halo reabilitasaun ka konstrusaun ba eskola haat ne’e.

Entretantu, Ministériu Edukasaun Joventude no Desportu (MEJD), liuhosi ezekusaun Orsamentu Jerál Estadu (OJE) 2021, sei konsentra ba kontrusaun foun no reabilitasaun edifísiu eskola 222 iha Timor-Leste.

Projetu infraestrutura bázika hirak ne’e sei implementa iha Munisípiu Aileu hamutuk projetu 14, Ainaro 16, Baucau 26, Bobonaro 22, Covalima 17, Dili 24, Ermera 16, Lautem 18, Liquiça 14, Manatuto 12, Manufahi 16 no Viqueque 20.

Projetu hirak ne’e MEJD sei ezekuta ho orsamentu ne’ebé prevee iha kapitál dezenvolvimentu ho montante millaun $7-resin.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here