Ilustrasaun krime violénsia doméstika. Imajen/Google

DILI, 18 marsu 2021 (TATOLI)-Programa Monitorizasaun Sistema Judisiál (JMSP) husu ba instituisaun relevante sira  atu asegura direitu vítima violénsia bazeia ba jéneru, liu-liu ba kazu sira hanesan violasaun seksuál, abuzu seksuál aktu seksuál ho adolexente no violénsia doméstika ne’ebé rekere prova ka evidénsia sira inklui asegura vítima sira nia direitu hodi hetan protesaun no seguransa iha periodu implementasaun serka sanitária.

Nota komunikadu ne’ebé kinta ne’e Agência Tatoli asesu hosi JMSP relata  katak, aplikasaun serka sanitária no konfinamentu obrigatóriu difikulta vítima violénsia bazeia ba jéneru asesu ba serbisu asisténsia no asesu ba tribunál.

JSMP husu buka solusaun imediata iha situasaun serka sanitária no konfinamentu obrigatóriu husi Governu hodi limita movimentu ka sirkulasaun ba atividade sira, JSMP nafatin fó asisténsia limitadu ba vítima sira violénsia bazeia ba jéneru.

Husi asisténsia limitadu durante situasaun implementasaun serka sanitária no konfinamentu obrigatóriu ne’e, JSMP deskobre katak kazu barak mak akontese liu-liu kazu violénsia bazeia ba jéneru. Hanesan iha Munisípiu Ermera (Gleno) vítima sira violénsia bazeia ba jéneru kontinua lori sira nia kazu ba keixa iha Polísia-VPU Ermera, maibé Polísia sira rejista de’it kazu ne’e no haruka vítima sira fila-fali ba uma no la refere ba fatin sira ne’ebé vítima sira presiza apoiu tuir sira-nia kondisaun hanesan ba iha Pradet ka Uma Mahon tanba kumpre regra aplikasaun serka sanitária no konfinamentu obrigatóriu.

 JSMP konsidera katak importante tebes atu asegura direitu vítima violénsia bazeia ba jéneru liu-liu ba kazu sira hanesan violasaun seksuál, abuzu seksuál aktu seksuál ho adolexente no violénsia doméstika ne’ebé rekere prova ka evidénsia sira inklui asegura vítima sira nia direitu hodi hetan protesaun no seguransa, nune’e JSMP husu ba instituisaun relevante sira atu buka solusaun alternativa hodi hatán ba situasaun refere.

Mezmu iha situasaun serka sanitária no konfinamentu obrigatóriu, maibé Lei Nú. 2/2021, 01 Marsu, kona-ba Autorização da Renovação da Declaração do Estado de Emergência iha artigu 8 kona-ba asesu ba tribunál no mós  Provedoria Direitus Umanus no Justisa[1] ne’ebé hateten katak iha situasaun serka sanitária no konfinamentu obrigatóriu instituisaun sira hanesan tribunál, ministériu públiku ho Provedoria Direitu Umanu no Justisa nafatin hala’o sira-nia funsaun. Tanba ne’e tuir JSMP nia hanoin kazu sira hanesan ne’e presiza kontinua fó prioridade maske nafatin kumpre regra serka sanitária no konfinamentu obrigatóriu.

JSMP husu ba instituisaun relevante sira atu buka solusaun imediata hodi responde ba preokupasaun sira husi vítima violénsia bazeia ba jéneru ne’ebé durante implementasaun serka sanitária no konfinamentu obrigatóriu hasoru problema atu asesu ba serbisu asisténsia no asesu ba tribunál.

Jornalista   : Nelson de Sousa

Editór        : Francisco Simões

 

1 KOMENTÁRIU

HAKEREK NO HATÁN

Please enter your comment!
Please enter your name here