Diretóra JSMP, Ana Paula Marçal. Imajen/Domingos Piedade.

DILI, 18 marsu 2021 (TATOLI)—Programa Monitorizasaun Sistema Judisiál (JSMP-sigla inglés) espera proposta-lei númeru 26/V kona-ba atu aprova estatutu Orden ba Advogadu sira iha Timor-Leste (OATL) sai ba lei bele asegura asesu justisa ba ema hotu.

Notísia Relevante: JSMP apresia produtividade V lejislatura

Diretora Ezekutiva JSMP, Ana Paula Marçal, agradese ba Komisaun A ne’ebé sempre halo konsultasaun públika hodi rona ema hotu nia hanoin inklui JSMP kona-ba ezbosu lei foun orden ba advogadu sira iha Timor-Leste tanba durante ne’e JSMP monitoriza iha setór justisa nian.

“Uluk tenke obedese ba Ministériu Justisa maibé bainhira proposta-lei ne’e sai ba lei bele regula ona advogadu sira no ezbosu lei foun ne’e atu harii Organizasaun Advogadu Timor-Leste (OATL) tenke independente bazeia ba orden,” nia informa ba jornalista sira, iha Colmera, kinta ne’e.

Diretora JSMP nota katak ezbosu lei foun orden advogadu nian kompara ho versaun ida uluk iha ona mundansa ne’ebé di’ak tebes no mundansa sira ne’e barak mak korresponde ho rekomendasaun sira JSMP nian iha parasér ne’ebé hato’o ba Minstériu Justisa iha 2019.

Diretora JSMP ne’e konsodera ezbosu lei foun ne’e fó kompeténsia independénsia boot liu ba OATL, tanba iha ezbosu lei ida antes ne’e OATL iha dependénsia boot ba Ministériu Justisa.

Nune’e, JSMP espera ho prezensa OATL nian bele promove efetividade no kualidade atividade advokásia iha Timor-Leste hodi kontribui ba atinje objetivu Estadu hodi asegura asesu justisa ba ema hotu.

Parlamentu Nasionál liuhosi Komisaun A ne’ebé trata asuntu Justisa no KonstitusionálIha 04 Marsu 2021, Komisaun A Parlamentu Nasionál konvida JSMP, Advogadu Privadu nasionál no internasionál sira iha Timor-Leste.

Objetivu hosi audénsia ne’e mak atu ideia no esplora hanoin no komentáriu hosi advogadu privadu sira no JSMP kona-ba proposta Lei Nú. 25/V kona-ba Rejime Jurídíku ba Asosiasaun Públiku Profisionál no proposta Lei Nú. 26/V aprova Estatutu Orden Advogadu iha Timor-Leste.

JSMP apresia inisiativa Komisaun A hodi kria diskusaun ne’e, nune’e bele akumula hanoin no idea sira hotu hosi advogadu privadu nasionál no internasionál sira iha Timor-Leste no sosiedade sivíl atu hadi’a, no dezenvolve lei ne’e ho di’ak antes lori ba iha diskusaun no aprovasaun iha jeneranalidade iha plenária.

Nia haktuir, durante diskusaun ho Komisaun A, iha hanoin ida hateten seidauk to’o tempu no la nesesáriu atu kria Orden Advogadu tanba númeru advogadu iha Timor-Leste ki’ik no orden labele hamriik mesak ka independente tanba laiha kapasidade finanseira atubele sustenta nia funsionamentu no kapasita advogadu sira.

Enkuantu hanoin ida seluk aprezenta katak tempu to’o ona no nesesáriu duni atubele kria orden advogadu iha Timor-Leste hodi asegura atividade advokasia iha Timor-Leste no bele foka ba kapasitasaun ba advogadu sira, nune’e bele hasa’e kualidade advogadu sira-nian.

Relasiona ho kestaun kapasidade finanseira ne’e, Diretora JSMP fó hanoin atu bele inklui kedas iha lei ne’e regalia ruma hosi Governu atu bele apoiu serbisu administrasaun sekretariadu Organizasaun Advogadu Timor-Leste (OATL) nomoos formasaun kontinua ba advogadu sira.

JSMP mós fó hanoin apoa orsamentu ne’e tranzitoria de’it iha períodu balun to’o OATL ne’e bele ona iha kapasidade finanseira atu bele funsiona rasik.

Maske nune’e, JSMP haree katak iha ezbosu lei orden advogadu ne’e seidauk inklui atividade prinsipál iha advokasia nian mak hanesan asesoria jurídika.

“Atividade ida-ne’e mak tuir JSMP nian hanoin no realidade Timor-Leste nian bele sai atividade privativa advogadu sira. Atividade ida mak konsulta jurídika ne’e bele ezerse hosi advogadu sira no instituisaun sira seluk ne’ebé trata mós asuntu relevante ba kestaun jurídika, hanesan JSMP rasik,” nia haktuir.

Diretora JSMP ne’e esplika, iha diferensa entre konsulta jurídika no asesoria jurídika, ne’ebé konsulta jurídika ne’e sei la halo akompañamentu ba prosesu tomak kliente nian hahú husi inísiu to’o ramata.

“Atividade ne’e fornese de’it informasaun no solusaun ba kazu ne’e. Enkuantu asesoria jurídika ne’e akompaña prosesu tomak hahú inísiu to’o ramata (reprezenta iha tribunál),”
JSMP propoin ba Komisaun A.

Ho nune’e, JSMP fó hanoin atu bele konsidera iha prátika liuliu kestaun husu pagamentu ba kliente sira tenke refleta ba realidade Timor-Leste nian tanba maioria hosi populasaun sei moris iha liña pobreza nia okos.

Tanba, tuir JSMP nia akompañamentu, iha kazu balun akontese pagamentu ne’ebé husu aas liu fali valór ne’ebé konstitui iha kazu ne’e (valór asaun).

Nune’e, JSMP sujere atu montante pagamentu ne’ebé husu tenke menus hosi valór materiál ne’ebé konstitui iha kazu ne’e atu nune’e kliente bele sente hetan benefísiu husi serbisu advokasia ne’ebé advogadu privadu sira fornese.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here