Playground foun ne’ebé konstrui hosi Programa Nasionál Dezenvolvimentu Suku (PNDS). Imajen/Zito António.

DILI, 18 marsu 2021 (TATOLI)—Estudante na’in 70 hosi Edukasaun Pré-Eskolár (EPE) Epelu, aldeia Raukasa, suku Lauhata postu administrativu Bazartete Munisípiu Liquiçá, hahú asesu fatin halimar (Playground) foun, ne’ebé konstrui hosi Programa Nasionál Dezenvolvimentu Suku (PNDS) ho orsamentu rihun $3, apoiu hosi Governu Nova Zelándia.

Diretór Serbisu Edukasaun Munisípiu Liquiçá (DSEML), Zito António, hateten konstrusaun ba fatin halimar ne’e ho medida 6×8, entrega ona ba Ministériu Edukasaun Munisípiu liuhosi PNDS iha 17 marsu 2021.

Notísia relevante:Estadu Timor-Leste tenke aposta liután ba edukasaun no saúde

“Fatin halimar ba labarik-sira ne’e kompletu kedan ho fasilidade atu bele tulun labarik-sira iha tempu deskansa. Espasu halimar ba labarik-sira ne’e asegura ho rede no odamatan hodi evita animál-sira labele tama sai iha fatin ne’e,” Zito António  hateten ba jornalista Agência Tatoli via telefónika, kinta ne’e.

Konstrusaun ba fatin halimar ne’e PNDS hala’o durante fulan tolu, ne’ebé hetan mós apoiu hosi autoridade lokál-sira liu hosi prosesu identifikasaun.

EE Epelu hari iha tempu Indonézia hosi fundasaun Gorreti ne’ebé oras ne’e daudaun iha profesór na’in-rua, permanente na’in ida no kontratadu na’in ida.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here