Uma Na’in ba Uma Aluga (kost) iha Sentru Becuse, Elisabet da Silva Soares (hamriik klaran), fó aopiu ba estudante sira hela iha nia uma kost hodi fó nesesidade bázika ba estudante, Aquilis Coreia Amaral (liman loos). Imajen TATOLI/Arminda Fonseca.

DILI, 18 marsu 2021 (TATOLI)—Uma Na’in ba Uma Aluga (kost) iha Sentru Becuse, Suku Becora, Postu Administrativu Cristo Rei, Munisípiu Dili, Elisabet da Silva Soares, ohin, fó apoiu umanitária ba estudante sira-ne’ebé mai hosi munisípiu ne’ebé agora daudaun aluga hela ninia uma.

Nia hatutan, asaun karidade no umanitária ne’ebé nia halo la’os tanba buka oin maibé tanba haree ba serka sanitária ne’ebé aplika iha Dili no munisípiu balun, halo estudante sira-nia inan-aman labele haruka osan ba oan sira hola hahan, entaun nia ho iniasiativa rasik fó apoiu ne’e ba estudante sira.

“Apoiu umanitária ne’ebé ha’u halo la’os tanba ha’u buka oin ka buka naran. Maibé ha’u nu”udár na’in ba uma ne’ebé sira aluga hela, loro-oron ha’u mai vizita haree, sira triste ba hahan. Tanba laiha hahan entaun ha’u hanoin sira, foti inisitiva fó apoiu uitoan tuir kbiit ne’ebé ha’u iha,” Elisabet da Silva Soares hateten ba Agência TATOLI hafoin fahe apoiu umanitária ba estudante sira-ne’ebé hela iha ninia uma aluga, Sentru Becuse, Becora, Dili, kinta ne’e.

Estudante sira ne’ebé hela uma aluga ne’e, nia dehan, maiória hosi munisípiu ne’ebé agora daudaun ne’e governu aplika serka sanitaria mak hanesan Munisípiu Covalima, Baucau, Viqueque no inklui Munisípiu Liquiça.

Nia afirma, uma ne’ebé nia fó aluga ba estudante sira hela ne’e, kuartu hamutuk 18 no hosi kuartu 18 ne’e, estudante sira-ne’ebé hela iha kuartu hirak ne’e totál hamutuk ema na’in-30 kompostu hosi feto na’in-14 no mane na’in-16.

Uma Na’in ba Uma Aluga (kost) iha Sentru Becuse, Elisabet da Silva Soares (hamriik klaran), fó aopiu ba estudante sira hela iha nia uma kost hodi fó nesesidade bázika ba estudante siral. Imajen TATOLI/Arminda Fonseca.

“Apoiu ne’ebé ha’u fó no fahe fó ba estudante sira mak hanesan foos saka 16 ne’e, kada kuartu ida, foos saka ida, supermie sedaap falun lima, mina han nian  litru ida, no manu tolu rak sorin-sorin hodi fó ba sira. Maibé, bainhira sira han hotu, presiza tan karik, nu’udar inan ida, ha’u sei iha fuan atu ajuda nafatin sira,” nia dehan.

Nia dehan, buat ne’ebé ohin nia halo labele to’o iha nia deit maibé asaun ne’ebé nia halo ne’e, espera ba oin maluk sira seluk hamutuk ho nia bele apoiu tan ba estudante sira-ne’ebé hela iha Dili no hela iha uma aluga sira-ne’e.

Iha fatin hanesan, estudante UNITAL hosi Munisípiu Covalima ne’ebé aluga uma ne’e, Letícia Antónia Barros, hateten sente kontente no agradese tanba bele hetan apoiu umanitária hosi na’in ba uma ne’ebé sira aluga daudaun ne’e.

“Ha’u agradese no sente orgullu tanba iha situasaun defísil hanesan ne’e, kost na’in sei iha fuan boot hodi ajuda ami,” nia dehan.

Entretantu, estudante UNTL hosi Munisípiu Viqueque ne’ebé hela mós iha kost ne’e, Aquilis Coreia Amaral, hateten sente haksolok tebes ba uma na’in ne’ebé fó apoiu umanitária ba sira tanba situasaun serka sanitária ne’e, sira sente terus ba hahan no defísil tebes atu hetan hahan ruma hodi kalsu netik sira-nia kabun.

“Ha’u agradese no sente kontente tanba ha’u-nia Munisípiu Viqueque agora iha hela situasaun lockdown, ne’ebé labele halo movimentu. Maibé, ho apoiu uitoan hosi uma na’in, iha situasaun defísil hanesan ne’e. Liuhosi asaun karidade ne’ebé uma na’in halo ba ami, espera ba oin Governu no timoroan seluk ajuda tan ami, tanba apoiu ne’ebé nia fó ba ami tuir kbiit ne’ebé nia iha,” nia hateten.

Jornalista: Arminda Fonseca 

Editór: Cancio Ximenes.

HAKEREK NO HATÁN

Please enter your comment!
Please enter your name here