Diretora Programa Nasionál Dezenvolvimentu Suku (PNDS), Claudina Soares Pinto. Imajen TATOLI/Osória Marques.

DILI, 18 marsu 2021 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudina Soares Pinto, hateten ekipa tékniku PNDS seidauk konklui sensibilizasaun ‘Uma Kbiit Laek’ (UKL) ba lider komunitáriu no komunidade iha territóriu, tanba fatin balun iha hela periúdu serka sanitária.

“Suku iha munisípiu hotu-hotu konklui ona, agora falta suku 21 hosi suku 18 iha RAEOA no suku tolu iha postu administrativu Fatumean, Kovalima mak seidauk”, Claudina Soares Pinto hateten ba TATOLI liuhosi telefónika, kinta ne’e.

Fatumean, nia dehan suku balun sei iha periúdu serka sanitária, enkuantu RAEOA, ekipa sira hosi Dili seidauk bele tama, tanba periúdu serka sanitária iha kapitál foun bele termina iha loron 2 fulan-abríl 2021.

“Depois sensibilizasaun ita kontinua kedas ho forma ekipa ho verifikadór ema na’in-ualu ne’ebé xefia hosi xefe suku, Prezidente Komité Planeamentu no Akuntabilidade (KPA), estrutura PNDS nian iha suku, xefe aldeia inklui mós joven feto no mane, Ofisiál Polísia Suku (OPS), reprezentante veteranu no mós ekipa saúde sira. Sira ne’e hetan kedas treinamentu hosi ekipa tékniku,” nia dehan.

Lista benefisiáriu sira, nia dehan, xefe aldeia mak aprezenta ba ekipa PNDS nian, depois ekipa verifikasaun halo sensibilizasaun ba kandidatu ne’ebé konsidera kbiit laek.

Tuir nia, bainhira ekipa halo verifikasaun mak benefisiáriu ne’ebé la prienxe kritériu, ekipa elimina kedas, kontinua halo verifikasaun ba uma benefisiáriu nia kondisaun, ekonómia no sosiál.

“Ami verifika no konklui tiha ona. Benefisiáriu kada aldeia ida, ema na’in-tolu. Agora, ekipa ba sukat uma ne’e, nia medida atu bele iha ajustamentu,” nia hateten.

Munisípiu ne’ebé survei hotu ona, nia informa; Aileu, Ainaru, no Likisá. Munisípiu Baukau, suku Seiçal no  Bucoli mak seidauk halo survei tanba suku rua ne’e momentu ne’eba distribui hela cesta bázika.

“Espera, munisípiu seluk bele konklui ona faze verifikasaun iha semana ne’e nia-laran. Munisípiu Vikeke ho suku rua dadaun ne’e sei serka sanitária maibé munisípiu ne’ebé la serka sanitária, ita-nia ekipa kontinua la’o hela. Uma ne’ebé survei hotu ona hamutuk 1.203,” Claudina relata.

Diretora PNDS haktuir, medida uma ne’ebé kiik ho kuartu rua mak gastu orsamentu rihun $14-$16 maibé bainhira medida boot ho nia kuartu tolu mak ho osan rihun $17.

Jornalista       : Osória Marques

Editór             : Cancio Ximenes

HAKEREK NO HATÁN

Please enter your comment!
Please enter your name here