Prezidente CLN, Augusto Junior Trindade. Imajen/ Nelson de Sousa

DILI, 18 marsu 2021 (TATOLI)–Sentru Lojístika Nasionál (CLN, sigla portugés) prepara ona foos hodi transporta ba munisípiu Lautém, tanba hosi munisípiu ne’e labele movimenta, daudaun Governu inpoin serka sanitária no konfinamentu obrigatóriu iha munisípiu Baucau no Viqueque to’o 29 marsu.

Prezidente CLN, Augusto Junior Trindade, hateten parte armazen nasionál simu ona pedidu hosi Lautém tanba foos hahú menus iha merkadu.

“Ami simu ona karta hosi Lautém no ami prepara ona foos tonelada 1.000, maibé sei hein autorizasaun hosi Sala Situasaun Sentru Integradu Jestaun Krize atubele lori sai,” Responsável armazen nasionál informa ba Agência TATOLI via telefónika, kinta ne’e.

Notísia relevante: Stock foos iha Lautém hahú menus

Aleinde ne’e, ohin parte CLN no Ministériu Koordenadór Asuntu Ekonómia (MKAE) koodena hodi trata dokumentu.

“Ohin ha’u iha Ministru trata dokumentu hato’o ba Sentru integradu Jestaun Krize no ohin parte ministériu submete ona dokumentu,” nia akresenta.

Nunee, Prezidente CLN espera dokumentu bele aselera hodi tarde liu bain-rua bele sai ona.

Antes ne’e, iha jullu 2020, Governu halo akizisaun foos tonelada 30.000 hosi Vietname no foos ne’ebé importa hosi setór privadu no produsaun rai-laran.

Stock iha armazen nasionál hasai ona tonelada 1.000 ba Ministériu Solidaridade Sosiál (MSSI) iha ámbitu ajuda umanitária no Sekretaria Estadu Protesaun Sivíl (SEPS) tonelada 2.000-resin hodi tulun komunidade afetadu ba dizastre naturál.

Aleinde ne’e, MKAE hasai despaisu husu CLN halo intervesaun merkadu ba fatin afetadu ba serka sanitária hanesan Bobonaro no Covalima,inklui Rejiaun Administrativa Espesál Oé-cusse Ambeno (RAEOA) hamutuk tonelada 5.000, tanba ne’e agora foos iha armazen nasionál falta iha tonelada 23.000-resin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here