Administradór Covalima, Francisco de Andrade Imajen/Espesiál.

DILI, 18 marsu 2021 (TATOLI)–Administradór Munisípiu Covalima, Francisco de Andrade, hateten nu’udár reprezentante Governu Sentrál iha Munisípiu Covalima, iha nia mandatu tinan-lima dahuluk ne’e sei fó prioridade liu ba dezenvolvimentu infraestrutura bázika.

Notísia Relevante: Governu dezafia administradór foun atu dezenvolve Covalima

“Dahuluk, ha’u reprezenta Governu Sentrál iha Munisípiu Covalima hanesan Administradór foun, iha hau-nia mandatu tinan-lima nia laran, ha’u-nia planu atu halo la sees hosi planu estratéjiku 2011-2030 ninian maibé prioridade liu mak konsentra liu ba dezenvolvimentu infraestrutura báziku hanesan Bee-moos, estrada no saúde,” Francisco de Andrade hateten ba Agência TATOLI liuhosi telefónika, kinta ne’e.

Nia hatutan, tanba populasaun ne’ebé moris iha munisípiu liuliu área rurál sira presiza tebes mak infraestrutura báziku.

“Hanesan ema hotu hatene katak iha Covalima iha área potensiál ba agrikultór, maibé daudaun ne’e araska loos ho bee entaun sei haree ba ida-ne’e. Aleinde ida-ne’e, ha’u sei haree mós edukasaun tanba eskola nu’udár xave ba buat hotu, entaun bainhira eskola la di’ak dezenvolvimentu nasaun nian mós la la’o,” nia dehan. 

Nune’e, nia hateten, sei haree mós ba saúde ninian tanba Ministériu Saúde iha ona planu halo kontratu ba ema hansaen saúde públiku, parteira, enfermeira atu koloka ba kada suku iha Cavalima, oinsá haree ba komunidade nia saúde. 

Nia hateten, daudaun ne’e sei kontinua implementa planu sira ne’ebé antes administradór sesante halo ona tanba orsamentu mós prevee ona.  

“Ami iha munisípal mós ami iha dirasaun ida naran Planu Dezenvolvimentu Integradu Munisipál (PDIM), entaun iha ha’u-nia mandatu ne’e ami sei hamutuk haree ida-ne’e. Tanba, planu sira ne’e, balun aprezenta ona mai nasionál no iha ona OJE 2021 ne’e,” nia hateten. 

 Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here