Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

DILI, 17 marsu 2021 (TATOLI)—Xefe Suku Uma Ana Ulu, Postu Administrativu Venilale, Munisípiu Baucau, Vicente de Sousa Boavida, hateten uma-kain 10-resin iha Suku Uma Ana Ulu to’o agora seidauk asesu eletrisidade tanba hela dook hosi liña eletrisidade nian.

“Iha ami-nia suku ne’e asesu eletresidade dezde instala to’o agora ema hotu-hotu asesu, maibé uma-kain 10-resin mak seidauk asesu tanba sira hela dook hosi lina eletrisidade nian,” Vicente de Sousa Boavida hateten.

Nia dehan, uma-kain 10-resin ne’ebé seidauk asesu eletrisidade ne’e mai hosi Caihula balun, Nuno Doco, Osso-Gui-Gui, no Venilale tanba família sira-ne’e hela dook hosi aldeia.

“Suku Uma Ana Ulu asesu eletrisidade dezde tinan 2008 no 2012 populasaun hotu-hotu asesu ona. Só ita-nia uma-kain 10-resin ne’e mak la asesu to’o agora. Maibé, ami autoridade la nonook. Ami kontinua halo pedidu ba parte relevante maibé seidauk iha resposta,” nia dehan.

Autoridade lokál ne’e hateten, parte Eletrisidade de Timor-Leste (EDTL) Munisípiu Baucau haree no identifika ona atu ajuda tau solár panél maibé seidauk asina tanba ne’e EDTL seidauk bele monta.

“Agora ita-nia Estadu dekreta tan serka sanitária ba Munisípiu Baucau, entaun ita seidauk bele aprosima ba EDTL Baucau hodi monta solár panél ba uma-kain 10-resin ne’e,” nia dehan.

Uma-kain tolu benefisiáriu ba “Uma Kbiit Laek”

Aleinde de ida-ne’e, Xefe suku ne’e infroma katak uma-kain tolu (3) iha Aldeia Caiula, Suku Uma Ana Ulu, mak sai benefisiáriu ba Uma Kbiit Laek (UKL) hosi Programa Nasionál Dezenvolvimentu Suku (PNDS).

“Atu hetan Uma Kbiit Lael, ami identifika tiha ona uma-kain tolu (3) hosi Aldeia Caiula nian no relatóriu tama hotu ona, hein de’it bainhira mak konstrui Uma Kbiit Laek ne’e,”   Vicente de Sousa Boavida hateten ba Agência TATOLI liuhosi telefónika, tersa ne’e.

Autoridade komunitária ne’e hateten, antes ne’e uma-kain hitu 97) mak hatama dokumentu ba Uma Kbiit Laek ninian maibé uma-kain haat la prenxe kritériu hosi PNDS nian tanba ne’e sira la pasa.

Uma-kain haat la passa, nia dehan, tanba iha família ida uma laiha maibé hela ho ema seluk, seluk feto faluk ida hela mesak entaun labele hetan Uma Kbiit Laek, depois uma-kain ida fali defisiénsia maibé nia hetan ona apoiu hosi igreja ho Katilosa no família rua iha oan barak maibé na’in rua tenke dada rifa, ikus família ida hela.

Maibé, nia dehan, ida-nee foin mak faze dahuluk nian no parese sei iha tan oportunidade ba família seluk ne’ebé presiza duni. Nia dehan, iha Suku Uma Ana Ulu família kbiit laek mós barak maibé sei hetan oportunidade tuir faze.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here