Membru PNTL prontu fó seguransa. Imajen Tatoli/Antonio Goncalves

DILI, 17 marsu 2021 (TATOLI)-Polísia Nasionál Timor-Leste (PNTL) Munisípiu Dili halo hela servisu iha terrenu ho rigor tebes hodi identifika suspeitu ka autór sira ne’ebé maka tuda ekipa saúde iha área Caicoli ho Luru-Mata, Dili, foin lalais ne’e.

Segundu Komandante PNTL Munisípiu Dili, Superintendente Euclides Belo, seidauk bele fó informasaun kona-ba ema deskoñesidu ne’ebé antes ne’e tuda ekipa saúde iha Caicoli ho Luru-Mata, Dili, tanba prosesu lao hela iha parte serbisu investigasaun ne’ebé buka no  identifika suspeitu sira.

Notísia Relevante : PNTL apela ba komunidade Dili hakmatek iha uma

Atu evita asaun violénsia  hosi ema balun hasoru ekipa saúde bainhira ba foti abitante  ruma ninia amostra liuhosi teste  swab ka foti abitante ne’ebé suspeita  COVID-19 maka ba oin ekipa médiku sira tun iha terrenu no akompaña hosi membru PNTL.

Superintendente Euclides Belo, hateten polísia ninia koordenasaun ho ekipa pilár hosi saúde la’o nafatin ho di’ak tebes no polísia prontu fó seguransa ba ekipada saúde bainhira tun iha terrenu.

Nia dehan, kada vez parte saúde komunika ba polísia  atu dezloka ba terrenu ruma maibé   polísia atende hela problema seluk tanba la konsege akompaña.

“Ita la espera ema médiku ho ambulánsia sira baibain ba tula ema nunka iha asaun ne’ebé akontese  hasoru maibé iha situasaun balun foin akontese hodi halo reasaun hasoru médiku sira  tanba ne’e ba oin bainhira sira atu ba fatin pasiente ruma komunika polísia bele asegura no akompaña,” Euclides Belo hateten hodi responde Agência Tatoli iha Komandu PNTL Munisípiu Dili, kuarta ne’e.

Nia husu ba komunidade hotu atu bele kontribui ho ekipa saúde hodi  garante Dili seguru ba ema hotu hodi serbisu no hala’o atividade loron-loron nian.

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here