Primeiru-Ministru, Taur Matan Ruak. Imajen TATOLI/Egas Cristóvão

DILI, 17 marsu 2021 (TATOLI)Primeiru-Ministru (PM), Taur Matan Ruak, hasoru malu ho Prezidente Repúblika (PR), Francisco Guterres ‘Lú Olo’, hodi diskute hamutuk pontu importante sira relasiona ho apoiu sidadaun iha ámbitu implementasaun serka sanitária iha kapitál Dili.

Iha enkontru ne’e, parte rua ko’alia kona-ba situasaun atuál país no esforsu saida mak Governu halo atubele prepara-an didi’ak hodi fó resposta ba evolusaun situasaun iha rai laran.

“Atu apoiu sidadaun sira tenke haree orsamentu suplementár ida, tanba ne’e Governu prepara orsamentu 2021 atu foku ba rekuperasaun ekonómika, ho hanoin ida katak situasaun COVID-19 nafatin ou menus, Governu nia foku nafatin iha rekuperasaun ekonómika, maibé infelizmente situasaun oin seluk, entaun ita tenke haree orsamentu ba ida ne’e,” PM Taur relata hafoin ramata reuniaun ho Xefe Estadu, iha Palásiu Prezidensiál, Bairro Pité, kuarta ne’e.

Ba kestaun ne’e, tuir PM iha dalan rua, iha Orsamentu Jerál Estadu (OJE) no seluk atu reforsa Fundu COVID-19.

“Ministériu Finansa agora haree hela tempu badak sira sei aprezenta proposta pasu saida mak Governu tenke halo atu iha osan,” nia akresenta.

Aleinde ne’e, PM konsidera iha nesesidade atu apoiu maka’as ekipa liña frente hanesan rekursu no lojístika atu sira bele halo serbisu di’ak liután iha terrenu hodi kombate vírus.

“Sala Situasaun Sentru Integradu Jestaun Krize (CICG, sigla portugés) prepara orsamentu ba munisípiu rua, maibé agora moras ne’e ba to’o ona munisípiu haat ka lima, ne’e signifika katak presiza reforsa orsamentu hodi hakbi’it sira no fó apoiu hodi sira serbisu di’ak liu,” nia hatutan.

PM refere ba intervensaun ekonómika no sosiál no apoiu umanitáriu ne’ebé Governu presiza halo hanesan iha tinan kotuk no halo intervensaun iha área barak hanesan ekonómiku no sosiál.

Kona-ba apoiu sira ne’ebé mak Governu pleneia atu fó ba sidadaun sira iha implementasaun serka sanitária ligadu ho COVID-19 iha Timor-Leste, Xefe Ezekutivu fó ona orientasaun ba ministériu sira hanesan Ministériu Koordenadór Asuntu Ekonómiku (MKAE), Ministériu Finansa (MF), Ministériu Solidariedade Sosiál no Inkluzaun (MSSI) hodi prepara planu sira.

“Ha’u fó ona orientasaun ba ministériu relevante atu haree inisiativa, programa no pasu saida maka tenke halo iha tempu ida ne’e hodi apoiu sidadaun sira,” Eis Xefe Estadu ne’e subliña.

Xefe Ezekutivu hato’o mós ba PR, katak situasaun agora iha kontrolu nia laran no sei la lakon kontrolu.

“Ha’u reforsa mensajen Sala Situasaun, baibain apela ba sidadaun sira atu tur hakmatek no Governu fó apoiu tomak hodi fó tempu ba ekipa liña frente sira buka tuir moras ne’e da’et iha ne’ebé? hodi neutraliza iha. Ha’u mós informa ba Prezidente Repúblika kona-ba oinsá Governu ninia hakat no saida mak Governu halo iha tempu oin mai,” PM akresenta.

Desde kazu konfirmadu pozitivu COVID-19 rejista dahuluk iha marsu 2020 iha Timor-Leste, rejista ona 208 no to’o horiseik, rejista kazu foun lima, ho totál kazu ativu ne’ebé daudaun baixa iha sala izolamentu iha Dili hamutuk 104.

Hosi totál kazu konfirmadu 208, na’in-169 hosi Dili, Covalima 19, Bobonaro neen, Baucau neen, Oé-cusse haat, Liquiçá rua no Viqueque rua.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here