Primeiru-Ministru, Taur Matan Ruak. Imajen TATOLI/Egas Cristóvão

DILI, 17 marsu 2021 (TATOLI)–Primeiru-Ministru (PM), Taur Matan Ruak, konsidera kondisaun deskontrolu COVID-19 ne’ebé rezulta evolusaun COVID-19 iha Timor-Leste tanba pasajen ilegál sidadaun via fronteira terrestre bá territóriu nasionál.

Xefe Governu hato’o lia hirak ne’e hodi hatan preokupasaun públiku, kona-ba durante períodu serka sanitária no konfinamentu obrigatóriu iha Dili, hahú loron 16 marsu to’o 02 abríl, Governu bandu viajen kualkér via mai Dili, maibé iha loron hirak liubá Aviaun euroAtlantic ho destinasaun Lisboa-Dili lori pasajeiru kuaze 200 hamutuk ho crew aviaun 15.

Pasajeiru sira hanesan profesór portugés ne’ebé durante ne’e hanorin iha Centro de Aprendizagem e Formação Escolar (CAFE) Liquiçá, traballadór no tékniku profisionál inklui estudante timor-oan.

“Aviaun euroAtlantic mai lori timor-oan no profesór sira, ne’ebé kuandu situasaun di’ak sira sei hanorin ita-nia oan sira. Tanba ne’e Governu loke esesaun, enkuantu haree ba ita-nia esperiénsia, faktu hatudu to’o agora deskontrolu ne’ebé akontese maihosi pasajen ilegál sira, maibé bainhira tama mai ho legál ita bele kontrolu no sira seidauk hada’et ba ema seluk,” PM Taur relata hafoin ramata reuniaun ho Prezidente Repúblika, Francisco Guterres ‘Lú Olo, iha Palásiu Prezidensiál, Bairro Pité, kuarta ne’e.

Notísia relevante: Pasajeiru 190 ne’ebé mai ho euroAtlantic iha ona kuarentena

Tuir PM, razaun Governu kontinua autoriza aviaun tama mai Timór tanba lakohi atividade totalmente paradu no sidadaun sira ne’ebé mak tama via aéreu iha relasaun ho servisu esensiál sira hanesan tékniku ba eletrisidade, profesór portugés no tékniku profisionál seluk.

“Ita jere situasaun ne’e labele mate antes tempu, ita iha dalan rua de’it, entre taka hotu ka ita jere ho forma progresiva atu atividade sira labele para totalmente. Ita husik sira tama maski serka sanitária aplika iha Dili no loke korridór atu fó nafatin espasu, tanba realidade durante períodu ne’e fó oportunidade nafatin halo atividade emerjénsia seluk hanesan sosa ai-han, moras lori ba ospitál, tékniku sira tau matan ba eletrisidade no seluk tan,” Xefe Ezekutivu esplika.

Daudaun ne’e pasajeiru tama ona iha kuerentena durante loron 14, tuir fatin ne’ebé Governu prepara hanesan, Otél Gólgota na’in-56, Otél Timor na’in-24, Beach Garden na’in-37, Palm Otél na’in-ualu,  Otél Luksuri na’in-15,  Otél Audian  na’in-18, Otél Fortuna na’in-19, Otél Kilatama  na’in-rua, Otél Arbiru na’in-10 no na’in-ida iha Otél Vila Verde.

Kazu pozitivu rejistadu iha Timor-Leste to’o ohin loron hamutuk 216 no hosi totál ne’e, na’in-113 rekuperadu no kazu ativu 107 ne’ebé daudaun baixa iha sala izolamentu iha Dili.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here