Diretór Ezekutivu CEPAD, João Boavida. Imajen Tatoli/Egas Cristóvão.

DILI, 17 marsu 2021 (TATOLI)-Atu evita povu ne’e halerik ba ai-han no nesesidade báziku sira durante aplikasaun serka sanitaria no konfinamentu domisiliáriu iha munisípiu tolu (Dili, Baucau no Viqueque), maka Governu iha obrigasaun moral no obrigasaun polítika atu kria polítika integradu hodi responde ba nesesidade bázika povu nian.

Lia hirak ne’e hato’o hosi Diretór Sentru Estudu ba  Pás no Dezenvolvimentu (CEPAD), João Boavida, bainhira responde Agência Tatoli, iha nia serbisu fatin, tersa loraik (16/03).

Notísia Relevante : PDHJ rekomenda ba Governu responde nesesidade bázika povu nian

João Boavida, hateten medida ne’ebé Governu   deside serka sanitária no konfinamentu obrigatóriu  pasu pozitivu tebes atu limite propagasaun COVID-19 no fasilita serbisu  saúde hodi bele atua tanba kada loron númeru kazu pozitivu COVID-19 aumenta ba beibeik. Maibé, tuir CEPAD nia observasaun katak iha serka sanitária fó mós iha impaktu negativu  liu-liu ba povu ki’ik ninia rendimentu ne’ebé depende ba sira nia atividade hala’o kada loron hetan netik rendimentu uitoan hodi sustenta moris.

João Boavida fó ezemplu traballadór sira ne’ebé  serbisu iha loza sira bainhira suspende serbisu automatikamente afeta mós ba sira tanba ne’e atu hatán ba problema ne’e Governu presiza kria polítika ida integradu, atu nune’e, labele hapara atividade ekonómika povu baibain nian.

Tuir nia haree loza baibain la’ós fan sasán nesesidade báziku tenke taka, maibé tuir loloos la presiza suspende sira-nia atividade no presiza liu mak  iha  mekanizmu autoriza loke maibé tenke kumpre regra protokolu saúde no halo rotasaun ba traballadór.

Bainhira loza ka kompañia sira  la halo  tuir medida sira, João Boavida, afirma   aplika sansaun ruma hodi suspende ninia atividade hafoin mak reativa fila-fali. Tanba ne’e presiza mekanizmu ida di’ak oinsá atu labele suspende hotu atividade sira tanba sei prejudika tebes ba sidadaun sira.

João Boavida, husu ba Governu presiza  halo levantamentu  ida ba komunidade  iha área sira ne’ebé  hasoru serka sanitária ne’ebé  kategoria sofre no vulneravel liu atu bele fó asisténsia ruma.

Nia dehan, Governu se foku loos ba iha subsídiu de’it iha serka sanitária nu’udar polítika ka medida  úniku hodi limite propagasaun COVID-19, pergunta mak ne’e, to’o bainhira mak polítika subsídiu Governu nian bele lao nafatin ninia sustentabilidade ne’e iha ne’ebé?

“Atu fó subsídiu ba povu tomak bainhira iha situasaun kalamidade  públika hanesan situasaun surtu COVID-19 ne’ebé daudaun ne’e Timor-Leste enfrenta. Maibé sustentabilidade subsídiu nian laiha tanba ne’e Governu tenke kria polítika integradu hodi hatoman Timoroan sira atu moris iha norma foun ida hakarak ka lakohi tenke kumpre ba regra protokolu saúde nian,’’ João Boavida hateten.

Osan subsídiu, tuir nia haree bele tau fali ba iha sektór agrikultura, edukasaun, saúde ho área sira seluk  hodi investe, nune’e bele fó sustentabilidade ba iha nasaun tempu oin mai.

CEPAD haree mós katak esforsu Governu nian iha implementasaun serka sanitária no konfinamentu obrigatóriu di’ak tebes atu kombate sedu hodi bele hapara korrente propagasaun surtu  COVID-19. Maibé Governu kontinua autoriza sidadaun sira hosi nasaun seluk tama mai Timor-Leste  no iha rai laran implementa hela serka sanitária hodi haruka povu hakmatek iha uma.

“Ida ne’e povu bele lakon konfiansa ba polítika Governu nia responsabilidade no bele lori risku mai rai-laran,” João Boavida kestiona, hodi dehan tan, Governu laiha manutensaun di’ak ba fasilidade fatin sanitária iha fatin públiku ne’ebé antes ne’e iha Estadu Emerjénsia dahuluk mai oin hamutuk ho parseiru sira  harii tanba ne’e daudaun fatin públiku maioria fasilidade sira ladún funsiona ho di’ak.

Grupu marjinalizadu hetan diskriminasaun

Tuir observasaun CEPAD iha territóriu nota mós katak, iha implementasaun Estadu emerjénsia (EE) hahú iha  fulan marsu tinan kotuk mai ohin,  Governu foti ona polítika lubuk hodi hatán ba surtu COVID-19 iha implementasaun polítika no rezolusaun lao tuir  ne’ebé haree liubá EE la’o di’ak tebes mai ho limitasaun ka restrisaun to’o mai serka sanitária, maibé  hamosu ona diskriminasaun ba grupu marjinalizadu sira hanesan iha programa Cesta Bázika la haree grupu LGBT (Lesbian, Gay, Bisexual, Transgender), idózus, ema ho defisiénsia ne’ebé  la fó importánsia no oportunidade hanesan.

“Hanesan iha programa Cesta Bázika, ita haree partisipasaun grupu LGBT ninia prezensa laiha no mekanizmu distribuisaun ba idózus no defisiénsia laiha, feto no labarik vulneravel  tanba ne’e Governu bainhira hamosu polítika tenke hamosu mós medida ka polítika ida atu hatán diretamente ba grupu hirak ne’ebé antes ne’e hetan diskriminasaun,’’ nia hateten.

CEPAD liuhosi projetu monitorizasaun ba situasaun COVID-19 iha Timor-Leste  ne’ebé hetan  finansiamentu hosi Uniaun Europeia iha faze inisiál sei foku ba rekursu no  situasaun COVID-19 iha Timor-Leste  daudaun hamosu ona manual sidadaun nian  katak sidadaun ida-idak iha direitu  atu hetan no husu  informasaun  husi Governante, instituisaun públiku kredivel no ofisiál ne’ebé iha tanba sira obrigasaun atu pasa sidadaun ida-idak kona-ba polítika no rezolusaun ne’ebé foti ka implementa.

Projetu monitorizasaun CEPAD nian ho nia alvu iha Governasaun sai transparente hodi hamosu rekursu  ne’ebé ema hotu-hotu iha asesu ho igualdade, liberdade, justisa sosiál.

Jornalista   : Nelson de Sousa  

Editór        : Francisco Simões

HAKEREK NO HATÁN

Please enter your comment!
Please enter your name here